Չեմպիոնների լիգա. Խմբային փուլում գրանցված ռեկորդները
11/12/2014 18:31
Նմանատիպ
Եթե Լիոնել Մեսսիի համար ռեկորդներ սահմանելն աստիճանաբար սովորական դառնում է, ապա Լուիս Ադրիանոն կամ Չավի Էրնանդեսն այս տեսանկյունից չեն փայլում, իսկ ԲԱՏԷ-ն հաճախ չէ, որ հակառեկորդներ է գրանցում: Ներկայացնում ենք Չեմպիոնների լիգայի` 2014-15թթ. խաղարկության խմբային փուլի ընթացքում գրանցված ռեկորդները:
- F խմբի 6 խաղում Լիոնել Մեսսին խփեց 8 գոլ և դարձավ Չեմպիոնների լիգայի պատմության լավագույն ռմբարկուն` 75 գոլ: Այս ցուցանիշով Մեսսին գերազանցեց «Ռեալի» լեգենդար հարձակվող Ռաուլ Գոնսալես Բլանկոյին, ով այս մրցաշարում խփել է 71 գոլ: Չեմպիոնների լիգայի պատմության լավագույն ռմբարկուների տասնյակին կարող եք ծանոթանալ այս հղմամբ:
- «Շախտյորի» հարձակվող Լուիս Ադրինաոն խմբային փուլում խփեց 9 գոլ և կրկնեց Մադրիդի «Ռեալի» առաջատար Կրիշտիանու Ռոնալդուի` նախորդ մրցաշրջանում սահմանած ռեկորդը: Մրցաշարի պատմության ընթացքում ոչ ոք բացի Ռոնալդուից և Ադրիանոյից խմբային փուլում 9 գոլ չի խփել: Բացի այդ, 1 խաղում խփելով 5 գոլ` Ադրիանոն կրկնեց Լիոնել Մեսսիի ռեկորդային ցուցանիշը:
- «Բարսելոնայի» կիսապաշտպան Չավի Էրնանդեսը Չեմպիոնների լիգայում ամենաշատ խաղերի մասնակցած ֆուտբոլիստն է` 146:
- Մադրիդի «Ռեալը» դարձավ առաջին թիմը, որին հաջողվել է երկու անգամ հաղթահարել խմբային փուլի արգելքը` 6 խաղում տոնելով 6 հաղթանակ: Առաջին անգամ մադրիդցիները նման հաջողության հասել էին 2011-12թթ. մրցաշրջանում:
- «Ատլետիկի» հետ խաղում ԲԱՏԷ-ն բաց թողեց Չեմպիոնների լիգայի ընթացիկ խաղարկության խմբային փուլի իր 23-րդ և 24-րդ գոլերը ու սահմանեց մրցաշարի հակառեկորդ: 2011-12թթ. մրցաշրջանում խմբային փուլում 22 գոլ բաց էր թողել Զագրեբի «Դինամոն», իսկ 2012-13թթ. մրցաշրջանում` «Նորդշելլանդը»:
- Համեմատության համար` «Մոնակոն» դարձավ 9-րդ թիմը, որը մրցաշարի խմբային փուլի 6 խաղում միայն մեկ գոլ է բաց թողել: Երկու անգամ խմբային փուլերում մեկական գոլ է բաց թողել «Յուվենտուսը»` 1996-97թթ. և 2004-05թթ. մրցաշրջաններում:
- «Ռոմայի» ավագ Ֆրանչեսկո Տոտտին «Մանչեսթեր Սիթիի» հետ առաջին խաղում գոլ խփեց` դառնալով մրցաշարի պատմության ընթացքում գոլ խփած ամենատարեց ֆուտբոլիստը: Իսկ 5-րդ տուրի` ԲԿՄԱ-ի հետ խաղում 38 տարեկան 59 օրական (այդ պահին) Տոտտին գերազանցեց իր իսկ սահմանած ռեկորդը:
- Խմբային փուլի երրորդ տուրում «Բավարիան» արտագնա խաղում ջախջախիչ` 7:1 հաշվով առավելության հասավ «Ռոմայի» նկատմամբ և դարձավ Չեմպիոնների լիգայի պատմության առաջին թիմը, որին հաջողվել է 2 անգամ 1 խաղում 7 գոլ խփել: Առաջին անգամ մյունխենցիները նման արդյունքի հասել են 2009 թվականին` «Սպորտինգի» հետ խաղում:
- «Շախտյորը», երրորդ տուրում 7:0 հաշվով ջախջախելով ԲԱՏԷ-ին, դարձավ Չեմպիոնների լիգայի պատմության առաջին թիմը, որին հաջողվել է առաջին խաղակեսում 6 գոլ խփել:
- Երրորդ տուրի խաղային առաջին օրը (հոկտեմբերի 21-ին) գրանցվել է 40 գոլ: Սա ռեկորդային ցուցանիշ է 8 հանդիպումից բաղկացած խաղային օրվա համար:
Հետևեք մեզ նաև Telegram-ում