Չեմպիոնների լիգա. Խմբային փուլի լավագույնները
Նմանատիպ
Լուիս Ադրիանոն, Լեո Մեսսին, Ֆրանչեսկո Տոտտին, Մադրիդի «Ռեալը» ռեկորդներ սահմանեցին, Բրել Էմբոլոն բարձրաձայնեց իր տաղանդի մասին…
Չեմպիոնների լիգայի ընթացիկ խաղարկության խմբային փուլն արդեն անցյալում է, 1/8 եզրափակչի զույգերը հայտնի են, և ճիշտ ժամանակն է անցած փուլին հայացք գցելու համար:
Լավագույն ֆուտբոլիստը` Լուիս Ադրիանո («Շախտյոր»): Լուիս Ադրիանոն մինչ Չեմպիոնների լիգայի ընթացիկ խաղարկության մեկնարկն էլ Եվրոպայում հարգված ֆուտբոլիստ էր, սակայն մրցաշարի խմբային փուլում նա կարողացավ դասվել ռեկորդակիրների շարքին: ԲԱՏԷ-ի հետ արտագնա խաղում 27-ամյա ֆուտբոլիստը 5 գոլ խփեց և դարձավ երկրորդ ֆուտբոլիստը, ում հաջողվել է Չեմպիոնների լիգայի 1 խաղում 5 գոլ խփել (առաջինը նման արդյունքի հասել է Լիոնել Մեսսին): Բելառուսական թիմի հետ պատասխան խաղում Ադրիանոն հեթ-տրիկ ձևակերպեց` ընթացիկ խաղարկությունում խփած գոլերի քանակը հասցնելով 9-ի և կրկնելով Կրիշտիանու Ռոնալդուի ռեկորդը: Նախորդ մրցաշրջանում Ռոնալդուն խմբային փուլի արդյունավետության ռեկորդ էր սահմանել` խփելով 9 գոլ: Դե ինչ, 1/8 եզրափակիչ փուլի` «Բավարիայի» հետ խաղում «Շախտյորում» կա մեկն, ում վրա կարելի է հույս դնել:
Նոր տաղանդը` Բրել Էմբոլո («Բազել»): Կամերունական ծագմամբ Շվեյցարիայի քաղաքացիություն ստացած ֆուտբոլիստը նախորդ մրցաշրջանում երիտասարդական Չեմպիոնների լիգայի աստղերից էր, իսկ այս աշնանը բարձրաձայնեց իր մասին մրցաշարի գլխավոր խաղարկությունում: 17 տարեկան հասակում Էմբոլոն նա փոխարինման դուրս եկավ «Ռեալի» հետ խաղում, ապա մեկնարկային կազմում մասնակցեց «Լիվերպուլի» հետ տնային խաղին, իսկ «Լուդոգորեցի» հետ խաղում դարձավ դուբլի հեղինակ և օգնեց «Բազելին» 4:0 հաշվով հաղթանակ տոնել: Բայց ամենաուշագրավն այն է, որ այդ խաղի հաջորդ օրը Բրելը սովորականի պես գնաց դպրոց. «Ինձ զգուշացրել էին, որ դպրոցում լինեմ ճիշտ ժամանակին: Պայմանավորվածությունը պետք էր պահպանել»,-պատմում է երիտասարդ ֆուտբոլիստը:
Աստղային վետերանը` Ֆրանչեսկո Տոտտի («Ռոմա»): Տոտտին «Ռոմայի» կազմում գոլեր էր խփում, երբ Էմբոլոն չէր ծնվել (1997 թվականին), և դեռ չի հոգնել: «Մանչեսթեր Սիթիի» հետ արտագնա խաղում «գայլերի» առաջատարը գոլ խփեց և գերազանցեց Ռայան Գիգզի սահմանած ռեկորդը: Վերջինս Չեմպիոնների լիգայում գոլ խփած ամենատարեց ֆուտբոլիստն էր: Օրեր անց` 38 տարեկան և 59 օրական հասակում Տոտտին գերազանցեց իր իսկ ռեկորդը` գրավելով արդեն ԲԿՄԱ-ի դարպասը: «Ես արդեն ասել եմ, որ 38 տարեկան եմ, բայց տարիքս չեմ զգում»,-խաղից հետո հայտարարեց լեգենդար իտալացին:
Լավագույն թիմը` «Ռեալ»: Չեմպիոնների լիգայում «Ռեալը» բազմաթիվ ռեկորդներ է սահմանել, սակայն մադրիդցիները դրանցից չեն հոգնել: Ընթացիկ խաղարկության խմբային փուլում «Ռեալը» միայն հաղթանակ է տոնել` դառնալով առաջին թիմը, որին հաջողվել է երկու անգամ Չեմպիոնների լիգայի խմբային փուլն ավարտել 100 տոկոսանոց ցուցանիշով. առաջին անգամ նման հաջողության մադրիդցիները հասել էին 2011-12թթ. խաղաշրջանում: Բացի այդ, Կարլո Անչելոտիի թիմը, խմբում զբաղեցնելով առաջին հորիզոնականը, մոտակա մրցակցին գերազանցեց 11 միավորով:
Թիվը` 75, Լիոնել Մեսսի: «Բարսելոնայի» առաջատար Լիոնել Մեսսին շրջանցեց «Ռեալի» լեգենդար ֆուտբոլիստ Ռաուլ Գոնսալեսին և դարձավ Չեմպիոնների լիգայի պատմության լավագույն ռմբարկուն: Ռաուլը խփել էր 71 գոլ, Մեսսին այս խմբային փուլում խփած գոլերի քանակը հասցրեց 75-ի և սահմանեց նոր ռեկորդ: Ռաուլին գերազանցեց նաև Կրիշտիանու Ռոնալդուն, սակայն պորտուգալացու ակտիվում կա 72 գոլ:
Լավագույն խոսք` «Մենք փոքրիկ սպորտային հրաշք գործեցինք»: Այսպես «Յուվենտուսի» դարպասապահ Ջանլուիջի Բուֆֆոնը բնութագրեց «Օլիմպիակոսի» հետ դրամատիկ խաղում տոնած հաղթանակը (3:2), որն արդյունքում վճռորոշ եղավ, և թուրինյան թիմը դուրս եկավ 1/8 եզրափակիչ:
Լավագույն խաղը` «Մանչեսթեր Սիթի»-«Բավարիա»` 3:2: Խմբային փուլի 5-րդ տուրում «Մանչեսթեր Սիթին» եզրին էր հայտնվել, «Ռոման» պայքարը շարունակելու լավ հնարավորություն ուներ, սակայն ԲԿՄԱ-ին հաջողվեց ոչ-ոքի կորզել հռոմեացիաների հետ խաղում, իսկ «Մանչեսթեր Սիթին», «Բավարիայի» հետ խաղի ավարտից 5 րոպե առաջ 1:2 հաշվով պարտվելով, կարողացավ 3:2 հաշվով հաղթանակ տոնել: Խաղի վերջնամասում Սերխիո Ագուերոն հաղթանակ պարգևեց իր թիմին, իսկ հաջորդ տուրում` «Ռոմայի» հետ արտագնա խաղում տոնած հաղթանակի շնորհիվ «քաղաքաբնակները» դուրս եկան 1/8 եզրափակիչ:
Լավագույն գոլը` խմբային փուլի լավագույն գոլերը կարող եք դիտել և քվեարկել այս հղմամբ:
Հետևեք մեզ նաև Telegram-ում