Նովակ Ջոկովիչը կարիերայում առաջին անգամ հաղթեց «Ռոլան Գարրոսում»

Ֆրանսիայի Բաց առաջնության՝ «Ռոլան Գարրոսի» եզրափակչում աշխարհի առաջին ռակետ Նովակ Ջոկովիչն առավելության հասավ երկրորդ ռակետ Էնդի Մարեյի նկատմամբ։

Առաջին սեթը ձախողելուց և 3։6 հաշվով պարտվելուց հետո սերբ թենիսիստը հաջորդող 3 սեթում առավել վստահ հանդես եկավ՝ հաղթելով 6:1, 6:2, 6:4 հաշվով և նվաճելով «Ռոլան Գարրոսում» իր առաջին տիտղոսը։

Նովակ Ջոկովիչն ընդհանուր 11 անգամ հաղթել էր «Մեծ Սաղավարտի» մյուս մրցաշարերում՝ Ավստրալիայի Բաց առաջնությունում (6), «Ուիմբլդոնում» (3) և ԱՄՆ-ի Բաց առաջնությունում (2), իսկ Ֆրանսիայի Բաց առաջնությունում հաջողության չէր հասել։

Այս հաղթանակի համար Նովակ Ջոկովիչը կստանա 2 մլն դոլար մրցանակային գումար և 2000 վարկանիշային միավոր։ Նշենք նաև, որ սա Ջոկովիչի և Մարեյի 34-րդ հանդիպումն էր, սերբ թենիսիստը հաղթել է 24 անգամ։

Հիշեցնենք, որ կանանց մրցաշարի եզրափակչում Գարբինյե Մուգուրուսան հաղթել է WTA վարկանիշային աղյուսակի առաջին համար Սերենա Ուիլյամսին։