Հովհաննես Բաչկովն Օլիմպիական խաղերի ուղեգիր նվաճեց

Վենեսուելայում ընթացող APB-ի և WSB-ի պրոֆեսիոնալ բռնցքամարտիկների օլիմպիական վարկանիշային մրցաշարում Հայաստանը ներկայացնող 64 կգ քաշահյին Հովհաննես Բաչկովը կիսաեզրափակչում հաղթեց ուկրաինացի Վլադիմիր Մատվիչուկին և դուրս եկավ եզրափակիչ՝ նվաճելով Օլիմպիական խաղերի ուղեգիր: Այս մրցաշարում ուղեգիր են նվաճում 1-3-րդ տեղերը զբաղեցրած բռնցքամարտիկները:

Այսպիսով, բռնցքամարտի Հայաստանի հավաքականի 5 անդամներ կմասնակցեն Օլիմպիական խաղերին, ընդհանուր առմամբ այժմ Հայաստանն ունի 30 օլիմպիական ուղեգիր: Բռնցքամարտիկներից ավելի վաղ Օլիմպիական խաղերի ուղեգրեր էին ձեռք բերել 49 կգ քաշային Արթուր Հովհաննիսյանը, 52 կգ քաշային Նարեկ Աբգարյանը, 56 կգ քաշային Արամ Ավագյանն ու 69 կգ քաշային Վլադիմիր Մարգարյանը։