Դոհայի մրցաշարի եզրափակչում Ջոկովիչը հաղթեց Մարեյին (տեսանյութ)

ATP վարկանիշային աղյուսակի երկրորդ համար Նովակ Ջոկովիչը Դոհայի մրցաշարի եզրափակիչ խաղում առավելության հասավ առաջին ռակետ Էնդի Մարեյի նկատմամբ։

2 ժամ, 54 րոպե տևած համառ պայքարում սերբ թենիսիստը հաղթեց 6:3, 5:7, 6:4 հաշվով։ 29-ամյա Ջոկովիչի ակտիվում գրանցվեց 2 էյս, 3 բրեյք-փոյնթ, իսկ Մարեյը թույլ 4 տվեց կրկնակի սխալ, իրացրեց 2 բրեյք։

Այսպիսով, Նովակ Ջոկովիչն ընդհատեց Էնդի Մարեյի՝ պաշտոնական խաղերում 28 անընդմեջ հաղթանակների շարքը։ Վերջին անգամ Մարեյը պարտվել էր սեպտեմբերին․ բրիտանացի թենիսիստը Դևիսի գավաթի խաղարկությունում զիջել էր Խուան Մարտին դել Պոտրոյին։