Արտաշես Մադոյան. Սուսերամարտիկների ելույթներից գոհ չեմ
Նմանատիպ
Հայ սուսերամարտիկներն օրեր առաջ Բելառուսում մասնակցեցին մինչև 23 տարեկանների Եվրոպայի առաջնությանը: Էդուարդ Օվիկյանը (խոցասուսեր) չկարողացավ հաղթահարել որակավորման փուլը, իսկ Էմմա Պողոսովան (խոցասուսեր) և Մայքլ Հովհաննիսյանը (ճկասուսեր) պարտվեցին լավագույն 32-ի համար պայքարում:
Հայաստանի սուսերամարտի ֆեդերացիայի գլխավոր քարտուղար Արտաշես Մադոյանը ՀԱՕԿ լրատվականի հետ զրույցում անհաջող ելույթների վերաբերյալ իր մեկնաբանությունն է տվել։
«Մեր մարզիկները շատ ուժեղ խմբերում էին հայտնվել: Մինչև Եվրոպայի առաջնությունը մյուս սուսերամարտիկները մասնակցել էին այդ տարիքային խմբի Եվրոպայի գավաթի խաղարկության փուլերին, որտեղ միավորներ էին ձեռք բերել, իսկ մերոնք` ոչ: Այդ պատճառով վիճակահանությունը նրանց ուժեղների դեմ էր դուրս բերել: Ամեն դեպքում մեր սուսերամարտիկների ելույթներից գոհ չեմ: Ավելին էի ակնկալում:
Երիտասարդների աշխարհի առաջնությունից հետո մենք չէինք հասցրել որևէ մրցաշարի մասնակցել կամ հավաք անցկացնել: Տեղում մարզումներից հետո միանգամից գնացինք Եվրոպայի առաջնություն: Դա էլ իր ազդեցությունն ունեցավ»,- ասել է ֆեդերացիայի գլխավոր քարտուղարը:
Արտաշես Մադոյանը նաև տեղեկացրել է, որ 2018 թվականի Մ-23 տարեկանների աշխարհամասի առաջնությունն անցկացվելու է Հայաստանում:
Հետևեք մեզ նաև Telegram-ում