Ովքե՞ր 21 տարի անց «Այաքսին» դուրս բերեցին եվրագավաթի եզրափակիչ
Նմանատիպ
Ընթացիկ մրցաշրջանի սկզբում «Այաքսը» կորցրեց մի քանի առանցքային ֆուտբոլիստների, դուրս մնաց Չեմպիոնների լիգայի որակավորման փուլից և որոշ ժամանակ առաջնությունում ընթանում էր 8-րդ տեղում: Ձմռանը Պետեր Բոշի թիմը կերպարանափոխվեց: Տրանսֆերային պատուհանի ժամանակ ամստերդամցիները «ազատվեցին» բարդ բնավորություն ունեցող Էլ Գազիից ու Բազուրից, որոնց փոխարինեցին ավելի հավակնոտ խաղացողներ: Այդ ամենի արդյունքում թիմն անպարտելիության երկար շարք ունեցավ և դուրս եկավ Եվրոպա լիգայի եզրափակիչ:
Հատկանշական է, որ «Այաքսում» նախկինի պես երիտասարդներ են խաղում, որոնց միջին տարիքը 22,1 է, իսկ մեկնարկային կազմում հաճախ ընդգրկվում են 17-ամյա Ջասթին Կլյուվերտն ու Մատեյս դե Լիգտը:
Ներկայացնում ենք այն առանցքային ֆուտբոլիստներին, որոնց շնորհիվ «Այաքսը» 21 տարի անց հայտնվեց եվրագավաթի եզրափակչում:
Անդրե Օնանա – 21 տարեկան
2016 թվականի ամռանն «Այաքսը» թիմի բազմամյա դարպասապահ Յասպեր Սիլեսենը տեղափոխվեց «Բարսելոնա»: Հոլանդացուն փոխարինելու եկավ կամերունցի Անդրե Օնանան, ով կարողացավ հաղթել Տիմ Կրուլի հետ մրցակցությունը և դառնալ ամստերդամցիների հիմնական դարպասապահը: Աֆրիկացին արդեն «չոր» անընդմեջ հանդիպումների ռեկորդ է սահմանել: Օնանան «Բարսելոնայի» սան է և «հրեաներին» բաժին է հասել 150 հազար եվրոյի դիմաց:
Դեյլի Սինկգրավեն – 21 տարեկան
Սինկգրավենի օրինակով կարելի է հասկանալ, թե հոլանդացիներն ինչ նկատի ունեն՝ ասելով տոտալ ֆուտբոլ: Երկու տարի առաջ Դեյլին 7 միլիոն եվրոյի դիմաց «Հերենվենից» տեղափոխվեց «Այաքս»: Հոլանդացին հարձակվողական ոճի կիսապաշտպան էր, սակայն այդ դիրքում գործերը հաջող չդասավորվեցին, և նա ժամանակի ընթացքում տեղափոխվեց պաշտպանության եզր: Արդեն այսօր նա «WhoScored»-ի վարկածով Հոլանդիայի առաջնության լավագույն ձախ պաշտպանն է: Ցավոք, Եվրոպա լիգայի կիսաեզրափակիչ փուլի՝ «Շալկեի» հետ առաջին խաղում (2:0) Սինկրգավենը վնասվածք ստացավ:
Մատեյս դե Լիգտ – 17 տարեկան
Մեծահասակների ֆուտբոլում անցկացրած կես տարվա ընթացքում Դե Լիգտը հասցրել է նորամուտի խաղում գոլ խփել, հիանալի հանդես գալ եվրագավաթում ու Հոլանդիայի ազգային հավաքականի հրավերին արժանանալ: Այնուամենայնիվ, Բուլղարիայի հետ Աշխարհի 2018 թվականի առաջնության ընտրական փուլի խաղում կայացած նորամուտը աղետի վերածվեց: «Այաքսի» կազմում նա նույնպես մի քանի ցավալի սխալներ է թույլ տվել, սակայն մասնագետները շարունակում են նշել, որ 17 տարեկանի համար նա յուրահատակ ունակությունների է տիրապետում:
Դավինսոն Սանչես – 20 տարեկան
2016 թվականի ամռանը Դավինսոնն առաջարկ ուներ «Բարսելոնայից», սակայն ընտրեց «Այաքսը», որտեղ անհրաժեշտ խաղաժամանակ ստացավ և դարձավ թիմի առանցքային ֆուտբոլիստներից մեկը: Աթլետիկ տվյալներ ունեցող կենտրոնական պաշտպանը հիանալի է խաղում ինչպես սեփական, այնպես էլ մրցակցի դարպասի մոտ: Կոլումբացին գոլ+փոխանցում հաշվարկում 7 միավոր է վաստակել, ինչպես նաև բարձր արդյունքներ ունի պաշտպանական գործողություններում: «Բարսելոնան» շարունակում է հետևել Սանչեսի զարգացմանը, իսկ մասնագետները մեծ նմանություն են տեսնում նրա ու Խավիեր Մասկերանոյի խաղային որակների միջև:
Նիք Վիրգևեր (25) և Յոել Վելտման (27)
«Այաքսի» պաշտպանության «վետերանները»: Ինչպես հայտնի է հոլանդական գրանդը վաղուց աշխատում է տաղանդների աճեցնելու և նրանց թանկ գնով վաճառելու ուղղությամբ, սակայն Վիրգևերի ու Վելտմանիի համար, հավանաբար, այլևս չի հաջողվի մեծ գումար ստանալ: Փոխարենը նրանք իրենց փորձով օգնում են պատանի ու երիտասարդ խաղընկերներին:
Հակիմ Զիեշ – 24 տարեկան
Ներկայիս «Այաքսի» լավագույն ֆուտբոլիստը: Մեծ մասամբ հենց մարոկացու շնորհիվ Եվրոպա լիգայի կիսաեզրափակչի առաջին խաղում «Լիոնը» 1։4 հաշվով պարտության մատնվեց: Զիեշն այդ մրցավեճում երեք գոլային փոխանցում կատարեց: Հակիմը դեռ երկու տարի առաջ պետք է Հոլանդիայի հավաքականում Ուեսլի Սնեյդերի փոխարինողը դառնար, սակայն անհասկանալի պատճառներով Դանի Բլինդը նրան անտեսում էր: Վերջիվերջո, Զիեշը որոշեց խաղալ Մարոկոյի հավաքականում: Նախորդ տարվա օգոստոսին կիսապաշտանի համար «Այաքսը» «Տվենտեին» 11 միլիոն եվրո էր վճարել:
Ամին Յունես – 23 տարեկան
Փայլուն տեխնիկա ունեցող ձախ վինգեր, ում տրանսֆերը 2,5 միլիոն եվրոյով գնվել է Մյունխենգլադբախի «Բորուսսիայից»: «Լիոնի» հետ առաջին խաղում խփած գոլը նրա համար 7-րդն էր մրցաշրջանում: Եվս 13 անգամ նա գոլային փոխանցում է կատարել, այդ թվում՝ ֆրանսիացիների հետ պատասխան մրցավեճում: Լիբանանյան արմատներով ֆուտբոլիստը հանդես է եկել Գերմանիայի տարբեր տարիքային հավաքականներում, սակայն Յոահիմ Լյովի կողմից Բունդեսթիմին միանալու հրավերի համար հարկավոր է ավելի ուժեղ առաջնություն տեղափոխվել:
Դեյվի Կլասսեն – 24 տարեկան
«Այաքսի» ավագն ու առաջատարը: Ի տարբերություն իր գրեթե բոլոր թիմակիցների, Դեյվին իր ապագան կապում է «Այաքսի» հետ: Այն հարցին, թե արյդո՞ք չի ցանկանում գերակումբ տեղափոխվել, հոլանդացին պատասխանում է, որ արդեն այդպիսի թիմում է: Հոլանդիայի ընթացիկ առաջնությունում կենտրոնական կիսապաշտպանը 13 գոլ է խփել ու 9 գոլային փոխանցում կատարել: Կլասսենը հասցրել է նաև Հոլանդիայի հավաքականի առաջատարներից մեկը դառնալ:
Լասե Շոնե – 30 տարեկան
Ամստերդամցիների իրական վետերանը, ով նախորդ մրցաշրջանում կորցրել էր հիմնական կազմի ֆուտբոլիստի կարգավիճակը, սակայն վերջին կես տարում այն կրկին վերադարձրել է: Շոնեն երկար տարիներ «Այաքսի» առաջատարներից է, ով իր թնդանոթային հեռահար հարվածներով բազմիցս փրկել է թիմին:
Կասպեր Դոլբերգ – 19 տարեկան
2016 թվականի օգոստոսին նորամուտը նշելուց հետո Դոլբերգը Պետեր Բոշի թիմի կազմում մասնակցել է 46 խաղի, որոնցում 22 գոլ է խփել ու 8 գոլային փոխանցում կատարել: Հենց դանիացու գնդակների շնորհիվ «Այաքսը» 1/8 եզրափակչում հաղթեց «Կոպենհագենին»: Կասպերը նաև Ֆրանսիայում գրավեց «Լիոնի» դարպասը և իր թիմին դուրս բերեց եզրափակիչ: Դորտմունդի «Բորուսսիան», ի դեմս 187 սմ հասակ ունեցող կենտրոնական հարձակվողի, տեսնում է Ռոբերտ Լևանդովսկու երկարամյա հետնորդին:
Բերտրան Տրաորե – 21 տարեկան
Կիսաեզրափակչի առաջին խաղում 2 գոլ խփեց «Լիոնին», իսկ պատասխան մրցավեճում կարող էր ժամկետից շուտ հանել վերջնական հաղթողի հարցը: Բուրկինա Ֆասոն ներկայացնող աջ վինգերը նախորդ ամռանը վարձակալվել է «Չելսիից», որի կազմում էր 14 տարեկանից: Տրաորեն վնասվածքի պատճառով երեք ամիս բաց թողեց, սակայն ապրիլին 3 գոլ խփեց ու մասնակցեց ԱԶ-ի ու ՆԵԿ-ի նկատմամբ ջախջախումներին և կրկին դարձավ մեկնարկային կազմի ֆուտբոլիստ:
Ջասթին Կլյուվերտ – 17 տարեկան
Նա կլո՞ն է: Միգուցե «ծանոթով» թիմ գտած ֆուտբոլիստ: Ո՛չ, նա պարզապես լեգենդար ֆուտբոլիստի որդին է: Կլյուվերտ կրտսերը հիանալի է խաղում թիմային ֆուտբոլ, արտակարգ է խաբքի ժամանակ և պարտվել չգիտի: «Հրեաների» կազմում անցկացրած մեկնարկային 17 հանդիպումներում նրա թիմը 14 հաղթանակ է տոնել ու 3 ոչ-ոքի գրանցել: Երեկ նա փոխարինման մտավ խաղավարտից 9 րոպե առաջ, երբ իր թիմը 10 ֆուտբոլիստով զիջում էր 1:3 հաշվով: Թիմի թալիսմանին խաղադաշտ դուրս բերելով՝ Բոշն ապահովեց Եվրոպա լիգայի եզրափակչի ուղեգիրը:
Գլխավոր մարզիչ` Պետեր Բոշ – 53 տարեկան
Հոլանդիայում գերհաջողակ, սակայն վերջին երկու տարիներին չեմպիոնությունից զրկված Ֆրանկ դե Բուրին փոխարինելու կոչված Պետեր Բոշի գործերն անմիջապես լավ չգնացին: Արդեն նշել ենք, որ նրա թիմը չլուծեց գլխավոր խնդիրներից մեկը՝ դուրս չեկավ Չեմպիոնների լիգայի խմբային փուլ` զիջելով «Ռոստովին»: Սակայն մեկ տարում «Վիտեսից» ու «Մաքքաբիից» (Թել Ավիվ) հեռացած հոլանդացուն հրավիրել էին ոչ միայն արդյունքների, այլև Դե Բուրի ներարկած պրագմատիկ ֆուտբոլը փոխելու համար: Ընդամեմը կես տարի անց Յոհան Կրուիֆի ֆուտբոլաին փիլիսոփայության կողմնակիցը կերպարանափոխեց թիմի խաղը, «Այաքսին» 21 տարի անց դուրս բերեց եվրագավաթի եզրափակիչ, իսկ Էրեդիվիզայի ավարտից մեկ տուր առաջ չեմպիոնության հույսեր է պահպանում:
Աղբյուրը` Sports.ru
Լրացումները` Sport.Times.am-ի