USD
EUR
RUB

Ռուբեն Հայրապետյան․ Վերջապես այն հավաքականն ենք կառուցել, որի մասին երազում էինք

 
 
 

Հայաստանի ֆուտբոլի ֆեդերացիայի նախագահ Ռուբեն Հայրապետյանն այսօր մամուլի ասուլիս տվեց, որի ժամանակ խոսեց «Փյունիկն» Արթուր Սողոմոնյանին վաճառելու, Դավիթ Յուրչենկոյին Հայաստանի հավաքական հրավիրելու և այլ հարցերի մասին։

-Ինչպե՞ս ստացվեց, որ «Փյունիկը» վաճառեցիք Արթուր Սողոմոնյանին։

-Ոչ թե վաճառել եմ, այլ անվճար տվել։ Այդ ո՞վ պետք է «Փյունիկի» համար փող տար, որ մի հատ էլ վաճառեի։ Իրավիճակն այնպիսին էր դարձել, որ պետք ՀՖՖ-ից հեռանայի կամ «Փյունիկը» վաճառեի․ որոշեցի ՀՖՖ-ում մնալ։ 100 տոկոս բաժնետոմսերը 0 դրամով մեր ընտանիքը հանձնել է Սողոմոնյանին։ Նա այն նվիրյալն է, ով կարող է պահել ակումբը։ Նրան ենք փոխանցել «Փյունիկի» մանկապատանեկան դպրոցը։ «Փյունիկին» պատկանող գույքը շարունակելու է մեր ընտանիքի տիրապետության տակ մնալ, սակայն օգտագործման ենք հանձնելու նոր սեփականատերերին։

-«Փյունիկի» նոր սեփականատերը նշել էր, որ իր խնդիրն առաջիկա երկու տարում եվրագավաթի խմբային փուլի ուղեգիր նվաճելն է։ Այդ նպատակը իրագործելի՞ է։

-Իհարկե։ Մեր անձնական խոսակցության ընթացքում արդեն ասել է այդ նպատակների մասին։ Ամեն ինչ կախված է ակումբի բյուջեից, բարձրակարգ լեգիոներներ հրավիրելուց։

-Արթուր Սողոմոնյանը նաև հայտարարել էր «Փյունիկն» անվանափոխելու մտադրության մասին։ Ինչպե՞ս եք վերաբերվում այդ մտքին։

-Սեփականատերը նա է, իր որոշելիքն է։ Որքան գիտեմ՝ հանրային քննարկման է դնելու։ Ես էլ հակված չեմ ակումբը «Փյունիկ» անվանելուն։ Կարելի է հայկական լավ անուն դնել։

-«Փյունիկի» շուրջ շշուկներ են պտտվում, որ կարող են ակումբին միանալ այնպիսի մարդիկ, որոնց դուք հեռացրել եք հայկական ֆուտբոլից, օրինակ՝ Արարատ Ճաղարյանին։ Ինչպե՞ս եք վերաբերվում դրան։

-Քանի ես ֆուտբոլում կան, Ճաղարյանին ոչ միայն «Փյունիկի», այլ նույնիսկ «Փյունիկի» դարպասաների մոտ չեմ թողնի մոտենա։ Եվ դա բոլոր ակումբներին է վերաբերվում։ Հանուն ֆուտբոլի։

-«Լոռի» նորաստեղծ ակումբը մասնակցելո՞ւ է Հայաստանի Բարձրագույն խմբին։

-«Լոռին» դիմել և դարձել է ՀՖՖ-ի անդամ։ Մյուս մրցաշրջանում այդ ակումբը մասնակցելու է Առաջին խմբի առաջնությանը, իսկ համապատասխան տեղ գրավելու դեպքում կնվաճի Բարձրագույն խմբի ուղեգիր։

-Հավաքականի վերջին հաջողությունները պատասխանատվության մեծացման տեսանկյունից թիմում լարվածություն առաջացրե՞լ են։

-Չեմ կարծում։ Ընդհակառակը, հաղթանակը միշտ ոգևորություն է առաջացնում։ Չեռնոգորիայի հետ առաջիկա խաղը մեր հնարավորությունն է։ Հաղթելու դեպքում Աշխարհի առաջնության եզրափակիչ փուլին մասնակցելու հնարավորություն կստանանք։

-Ընկերական խաղ անցկացնելու համար ինչո՞ւ ընտրությունը կանգ առավ Սենթ Քիթս և Նևիսի ընտրանու վրա։

-Դա հավաքականի մարզիչն է որոշել։ Հավանաբար, նրա տակտիկական ծրագրերի համար է։ Ես չեմ հարցրել։

-Դավիթ Յուրչենկոյին հրավեր էիք ուղարկել։ Պաշտոնական պատասխան ստացե՞լ եք։

-Ինձանից լավ գիտեք նրա պատասխանը, կարդացել եք հարցազրույցը։ Վերջին 10 օրվա ընթացքում երևի 20 անգամ ֆեդերացիայի աշխատողները զրուցել են նրա հետ, բայց միևնույն է՝ ասում է, որ նրա հետ ոչ մեկ չի զրուցել։ Հիմա էլ եմ հայտարարում, որ գրկաբաց սպասում ենք Յուրչենկոյին։ Նույնը նաև «Ռոստովի» ֆուտբոլիստը (Խորեն Բայրամյանը-խմբ․)։ Մարզիչն էլ անձամբ գնաց։ Էլ ինչ անենք․․․

-Յուրչենկոն հավաքական գալու համար որպես խանգարող հանգամանք էր նշել Ռուսաստանի առաջնությունում լեգիոներ դառնալը, սակայն ինչպես հայտնի է, ԵՏՄ-ն օրենք է ընդունել այդ միության մեջ մտնող երկրների համար լեգիոների կարգավիճակի վերացման շուրջ։

-Եթե Յուրչենկոն ուզում է Հայաստանի հավաքականում խաղալ, կանի դա։ Մի մոռացեք Ռոման Բերեզովսկուն, ով երբեք լեգիոներ դառնալուց չի վախեցել։ Այսինքն՝ նա ու Ռուսաստանում հանդես եկող մեր հավաքականի մյուս անդամները սրտով ու հոգով մեր ընտրանու հետ են։ Յուրչենկոն լավ գիտի, որ լեգիոներ չի համարվելու։

-Յուրչենկոն հավաքական գալու համար գումար պահանջե՞լ է։

-Ոչ

-Ավելի հեռանկարային է Արսեն Բեգլարյանին հնարավորություն տա՞լը, թե՞ Դավիթ Յուրչենկոյին հրավիրելը։

-Արսենին ու Յուրչենոյին չի կարելի որակների առումով համեմտել։ Դավիթի մակարդակը շատ բարձր է։ Հետագայում Արսենը կարող է ավելի լավը դառնալ, բայց այս պահին Հայաստանի հավաքականին Յուրչենկոն է պետք։ Եթե նա հիմա չեկավ հավաքական, ուրեմն հետագայում այլևս հարկավոր չի լինի։ Նա մեզ պետք է Չեռնոգորիայի հետ վճռորոշ խաղում։ Հետո նաև Դանիայի ու Լեհաստանի հետ մրցավեճերում։ Եթե նա չեկավ, հետո ոչ մեկ չի կարող ինձ համոզել, որ նա արժանի է։ Հիմա մենք 17 տարեկան դարպասապահ ունենք, ով ֆանտաստիկ ֆուտբոլ է ցուցադրում, ելույթ է ունենում Ռուսաստանում։ Ժամանակ է պետք։ Դարպասապահի խնդիրը կկարողանանք հետագայում լուծել, իսկ Յուրչենկոն հիմա է պետք։

-Թբիլիսիում արդեն կայացել է Եվրոպայի սուպերգավաթ, Ուկրաինայում կանցկացվի Չեմպիոնների լիգայի եզրափակիչը, Էստոնիայում՝ Սուպերգավաթը։ Հայաստանում նման խոշոր մրցաշար սպասվո՞ւմ է։

- Այո, մինչև 19 տարեկանների Եվրոպայի առաջնության եզրափակիչ փուլը։ Ավելի խոշոր հանդիպում անցկացնելու համար համապատասխան մարզադաշտ չունենք։

- Իսկ «Հրազադա՞նը»։

-«Հրազդանը» վերակառուցելու համար մասնագետների էինք հրավիրել։ Պարզվեց՝ այնքան մեծ գումար է անհրաժեշտ, որ ավելի լավ է նոր մարզադաշտ կառուցել։ «Հրազդանում» միայն Հայաստանի առաջնության խաղ կարող ենք անցկացնել։ Միջազգայինները արգելված են։

-Վերջին շրջանում Սպորտի նախարար Հրաչյա Ռոստոմյանի հետ հեռակա վիճաբանության մեջ էիք․․․

- Չեմ ճանաչում նման մարդու։

-Հայաստանի ևս մեկ մրցաշրջան ավարտին մոտեցավ։ Դրական բաներ նկատո՞ւմ եք։

-Որևէ փոփոխություն չեմ նկատում։ Ընդհակառակը, բացասական շարժ կա։ Կարծում եմ՝ հաջորդ առաջնությունից փոփոխություններ կլինեն ու առաջնությունը կուժեղանա։ 2018-19թթ․ մրցաշրջանից առաջնությունը երկու թիմով կավելանա։ Այդ ժամանակ առաջխաղացում կլինի։

-Հենրիխ Մխիթարյանը դարձավ Եվրոպա լիգայի հաղթող։ Տեղյա՞կ եք՝ ծրագրվո՞ւմ է այդ գավաթը Հայաստան բերել։

-Բոլորիս շնորհավորում եմ Հենրիխի հաղթանակի համար, նա մեր հպարտությունն է։ Չեմ կարծում, թե «Մանչեսթեր Յունայթեդը» կամ ՈւԵՖԱ-ն թույլ կտան այդ գավաթը Հայաստան բերել։ Հուսով եմ՝ այս հաջողությունից հետո Մխիթարյանին գոնե կընդգրկեն տարվա լավագույն մարզիկների տասնյակում։

-Հայաստանի առաջնությունում երկրպագոների թիվն ավելացնելու համար ի՞նչ աշխատանքներ են կատարվում։ Հնարավո՞ր է դրա կազմակերպումը հանձնել այլ ընկերության։

-Աշխատանքներ կատարվում են, սակայն առաջնությունն այնքան թույլ է, որ դժվար մարդկանց համար հետաքրքիր դառնա։ Նախկինում թիմերն ուժեղ էին, բազմահազար երկրպագուներ էին ներկա լինում։ Երբ ակումբներն ուժեղանան, երկրպագուների համար հետաքրքիր դառնան, այդ ժամանակ մարզադաշտ կգան։ Նաև փորձել ենք կոմերցիոն կազմակերպությունների վաճառել առաջնության անցկացման իրավունքը․ վերջին անգամ՝ երկու ամիս առաջ, սակայն ցանկացողներ առայժմ չկան։

-Մոտ մեկ ամիս առաջ Յուրա Մովսիսյանը նշել էր, որ կարոտում է Հայաստանի հավաքականը։ Չե՞ք մտափոխվել նրան հավաքական հրավիրելու հարցում։

-Եթե կարոտում էր, թող չփախներ հավաքականից, չհրաժարվեր ելույթ ունենալ, հանդիպումից մեկ ժամ առաջ չգար ասեր՝ ոտքս ցավում է։ 3 տարի նա ֆուտբոլ է խաղացել։ Եթե մեկին կարոտում են, գնում նրան գրկախառնվում են։

-Գևորգ Կասպարովին կտեսնե՞նք հավաքականում։

-Ոչ։

-Ինչո՞ւ։

-Որովհետև մարզիչն է այդպես որոշել։

-Դուք համակարծի՞ք եք նրա հետ։

-Միշտ համակարծիք եմ մարզիչ որոշման հետ այնպես, ինչպես նա իմ որոշումների հետ, ընտանիքի նման։ Մեր հավաքականում վերջապես լավ աշխատակազմ է հավաքվել, այն հավաքականն ենք կառուցել, որի մասին երազում էինք։ Մի հրավիրեք այնպիսի մարդկանց, ովքեր մոլախոտի նման կգան ու ամեն ինչ կքայքայեն։ Հիմա գնացեք տեսեք՝ աշխատակազմից սկսած հավաքականի ֆուտբոլիստներով շարունակած բոլորն իրար «լպստելով» ման են գալիս։

- Կանանց և մանկապատանեկան ֆուտբոլի շուրջ ի՞նչ աշխատանքներ են կատարվում։

-Շատ են, բայց այդ մասին միայն ես եմ իմանում։ Ավելի լավ է խոսենք Գյումրու ակադեմիայի մասին, որտեղ նույնիսկ խոտ չի աճում, աղետալի վիճակի են հասցրել և դեռ ասում են, որ այդպես են ստացել։

-Տեղեկություն կա, որ Հայաստանում «Արցախ» անվամբ ակումբ է ստեղծվել։ Ճի՞շտ է։

-Այո, սեփականատերերը արտասահմանում բնակվող մեր հայրենակիցներն են, բանակցել ենք նրանց։ Ելույթները կսկսեն Առաջին խմբում։ Ցավոք սրտի, կոչվելու է «Երևանի Արցախ», բայց դա էլ մի բան է։

 

Հայկ Հովհաննիսյան

Լրահոս
Պաշտոնական. Վենգերը հեռանում է «Արսենալից» Անդրադարձեր և Մոյզես. «Չելսիի» արտագնա հաղթանակը (տեսանյութ) «Ատլետիկոն» խոշոր հաշվով պարտվեց (տեսանյութ) «Ռեալ» - «Ատլետիկ». Մադրիդցիները խաղավերջում փրկվեցին պարտությունից (տեսանյութ) Իտալիայի չեմպիոնական պայքարն ավելի սրվեց, թրիլեր Ֆլորենցիայում, այլ արդյունքներ (տեսանյութ) «Մանչեսթեր Յունայթեդը» ամրապնդվեց երկրորդ տեղում (տեսանյութ) Ագուերոյի համար մրցաշրջանն ավարտված է Հայտնի է Հայաստանի գավաթի եզրափակչի երկրորդ մասնակիցը (տեսանյութ) Վերջին 16 տարում առաջին անգամ «Բարսելոնայի» կազմում ակումբի սան չի եղել Անգլիայի առաջնության խորհրդանշական հավաքականը Ձեռքով գոլի պատճառով «Բարսելոնան» չհաղթեց «Սելտային» (տեսանյութ) Թենիսային հաշիվ. «Բավարիան»` Գերմանիայի գավաթի եզրափակչում (տեսանյութ) Վիդալի համար մրցաշրջանն ավարտված է Պատմության մեջ առաջին անգամ «Ալաշկերտը»` գավաթի եզրափակչում (տեսանյութ) «Ռեալ» - «Յուվենտուս» խաղի մրցավարը լուրջ սպառնալիքների է ենթարկվում Նեյմար. Ամենածանր պահին Մեսսին օգնեց ինձ Եվրոպայի առաջնության կմեկնի հունահռոմեական ոճի 7 հայ ըմբիշ Վասկես. Մարդիկ նախանձում են «Ռեալին» Յուրա Մովսիսյանի սկանդալային նորամուտը (տեսանյութ) ՊՍԺ-ն ջախջախեց «Մոնակոյին» և դարձավ Ֆրանսիայի չեմպիոն (տեսանյութ) Իսկոյի գոլի և գոլային փոխանցման շնորհիվ «Ռեալը» հաղթեց «Մալագային» (տեսանյութ) Հռոմեական դերբիում հաղթող չեղավ (տեսանյութ) «Մանչեսթեր Յունայթեդի» պարտության արդյունքում «Մանչեսթեր Սիթին» այսօր դարձավ Անգլիայի չեմպիոն (տեսանյութ) «Ատլետիկոն» հաղթեց «Լևանտեին», Տորրեսը դարձավ հոբելյանական գոլի հեղինակ (տեսանյութ) Ռուրյան դերբիում «Շալկեն» հաղթեց «Բորուսսիային» (տեսանյութ, լուսանկարներ) Բարձրագույն խումբ․ հետնապահները հաղթողին չորոշեցին (տեսագրություն) «Միլանը» և «Նապոլին» ոչ-ոքի խաղացին (տեսանյութ) «Արսենալը» պարտվեց «Նյուքասլին» և գրեթե զրկվեց 4-րդ տեղը զբաղեցնելու հնարավորությունից (տեսանյութ) «Ինտերն» ու «Ատալանտան» հաղթողին չորոշեցին (տեսանյութ) Եվս մեկ քայլ դեպի չեմպիոնությունը․ «Մանչեսթեր Սիթին» հաղթեց «Տոտենհեմին» (տեսանյութ) «Բավարիան» ջախջախիչ հաղթանակ տոնեց (տեսանյութ) «Լիվերպուլը» խոշոր հաշվով հաղթեց «Բորնմուտին» (տեսանյութ) Կիպրոսի Մ-15 հավաքականը՝ Զարգացման մրցաշարի հաղթող «Բարսելոնան» հաղթեց «Վալենսիային» և ռեկորդ սահմանեց (տեսանյութ) Զիդան․ Զայրացնում է, որ 11-մետրանոցը որակում են որպես գողություն Լինեկեր․ Բուֆֆո՛ն, հանգստանալու ժամանակն է Զարգացման մրցաշար․ Հայաստանի հավաքականները պարտվեցին «Շիրակը» ոչ-ոքի խաղաց «Գանձասար Կապանի» հետ, «Բանանցը» միացավ չեմպիոնական պայքարին (տեսանյութ) «Չելսին» կամային հաղթանակ տոնեց, Ժիրուն՝ դուբլի հեղինակ (տեսանյութ) Վարդան Մինասյան. Յուրա Մովսիսյանը կհրավիրվի հավաքական, եթե իր որակները ցույց տա
Ամենաընթերցված
website by Sargssyan