Պեպեի փոխարինողն ու այլընտրանք Մորատայի հեռանալու դեպքում․ երկու ֆուտբոլիստ վերադարձավ «Ռեալ»

Ֆրանկֆուրտի «Այնտրախտի» պաշտոնական կայքը տեղեկացնում է, որ կենտրոնական պաշտպան Խեսուս Վալյեխոն կարիերան շարունակելու է «Ռեալում»: Գերմանական ու իսպանական ակումբների վարձակալության համաձայնագրի ժամկետը լրացել է, և 20-ամյա ֆուտբոլիստը վերադարձել է Մադրիդ:

Ավելի վաղ հայտնի է դարձել, որ իսպանացին «Արքայական ակումբում» դառնալու է Պեպեի փոխարինողը: Պորտուգալացու պայմանագրի ժամկետը սպառվել է, և նա ազատ խաղացողի կարգավիճակ է ստացել:

Միաժամանակ մեկ այլ գերամանակ ակումբ` «Վոլֆսբուրգը» հայտարարել է, որ հարձակվող Բորխա Մայորալը նույնպես վերադարձել է «Ռեալ»: Սպասվում է, որ Ալվարո Մորատայի հեռանալու դեպքում «սերուցքայինների» գլխավոր մարզիչ Զինեդին Զիդանն նախապատրաստական շրջանում իրեն դրսևորելու հնարավորություն կտա 20-ամյա իսպանացուն: Վերջինս Բունդեսլիգայում անցկացրած 19 մրցավեճում 2 գոլ է հեղինակել:

Ամենայն հավանականությամբ, «Արքայական ակումբ» կվերադառնա նաև «Ալավեսում» վարձավճարով հանդես եկող կիսապաշտպան Մարկոս Լյորենտեն, ում ներկայությունը թույլ կտա ավելի շատ հանգիստ տրամադրել Կազեմիրոյին: