Լիլիթ Պողոսյանը Դանիայում կմասնակցի եռամյա ուսումնամարզական հավաքի
Նմանատիպ
Բատմինթոնի Հայաստանի հավաքականի առաջատար Լիլիթ Պողոսյանը մեկնել է Դանիա՝ մասնակցելու միջազգային ուսումնամարզական հավաքի, որը կազմակերպել է Եվրոպական կոնֆեդերացիան:
ՀԱՕԿ լրատվականի հետ զրույցում բատմինթոնի Հայաստանի ֆեդերացիայի գործադիր տնօրեն Հրաչյա Պողոսյանը նշել է, որ Լիլիթը Դանիայում մարզվելու է առաջիկա երեք տարիների ընթացքում.
«Եվրոպական կոնֆեդերացիան ընտրել է աշխարհամասի 18 ուժեղ մարզիկի, որոնց թվում է Լիլիթ Պողոսյանը: Հավաքի նպատակն է բատմինթոնիստներին պատրաստել որպես օլիմպիական խաղերի թեկնածուներ: Լիլիթը երեկ մեկնել է Դանիա, իսկ այսօր արդեն անցկացրել են առաջին մարզումը: Նրանք մարզվում են Հոլբեկ քաղաքի ուսումնամարզական կենտրոնում:
Լիլիթը պայմանագիր է ստորագրել Եվրոպայի կոնֆեդերացիայի հետ, որի համաձայն հավաքի ընթացքում նա տարին տասն անգամ պետք է մասնակցի միջազգային մրցաշարերի: Նա նաև առաջարկ է ստացել դանիական «Տաստռուփ» ակումբից: Պողոսյանն ընդունել է այդ ակումբում հանդես գալու հրավերը: Սա հիանալի նորություն է մեզ համար: Լիլիթի համար մեծ հնարավորություն է: Նա կկարողանա կանոնավոր խաղեր անցկացնել, փորձ փեռք բերել, մարզավիճակը պահպանել»,- ասել է Հրաչյա Պողոսյանը:
Հետևեք մեզ նաև Telegram-ում