Նովակ Ջոկովիչի վերադարձը անորոշ ժամանակով հետաձգվեց

Աշխարհի նախկին առաջին ռակետ Նովակ Ջոկովիչը, ով հուլիսին ժամանակավոր դադար էր վերցրել արմունկի վնասվածքից ապաքինվելու համար, չի կարողանա մասնակցել Աբու-Դաբիի ցուցադրական մրցաշարին։

Դեկտեմբերի 29-ին սերբ թենիսիստը պետք է պայքարը սկսեր կիսաեզրափակիչ փուլից և մրցեր Իսպանիայի ներկայացուցիչ Ռոբերտո Բաուտիստա-Ագուտի հետ, սակայն բժշկական խորհրդատվությունից հետո Նովակը հրաժարվել է պայքարից։ Դեռ հայտնի չէ՝ նա կկարողանա մասնակցել Ավստրալիայի բաց առաջնությանը։

Մրցաշարի մամուլի ծառայությունը գրում է, որ Ջոկովիչին փոխարինելու է բրիտանացի Էնդի Մարեյը, ով վերջերս է ապաքինվել վնասվածքից։

«Էնդի Մարեյը համաձայնել է խաղալ Բաուտիստա-Ագուտի հետ։ Խաղը կմեկնարկի տեղի ժամանակով 19։00-ին։ Նովակին շուտափույթ ապաքինում ենք մաղթում»,- ասված է մրցաշարի մամուլի ծառայության տարածած հաղորդագրությունում։