Զիդան․ Ցանկանում եմ՝ երկրպագուներն աջակցեն մեզ ինչպես լավ, այնպես էլ վատ պահերին
Նմանատիպ
Մադրիդի «Ռեալի» գլխավոր մարզիչ Զինեդին Զիդանն Իսպանիայի առաջնության 20-րդ տուրի՝ «Դեպորտիվոյի» հետ հաղթական հանդիպման (7:1) վերաբերյալ իր մեկնաբանությունն է տվել։ Ֆրանսիացի մասնագետը նաև անդրադարձել է Իսկոյին պահեստայինների նստարանին թողնելու որոշմանը և Կարիմ Բենզեմային ուղղված սուլոցներին։
«Մեզ համար շատ լավ հանդիպում էր։ Վերջին խաղերից հետո նման արդյունքի համար պետք է շատ գոհ լինենք։ Ես ուրախ եմ։ Թիմին անհրաժեշտ էր նման հաղթանակ։ Հիմա մեզ դրական արդյունքների շարք է հարկավոր։ Պետք է մտածենք առաջիկա խաղերի մասին։
Ինչո՞ւ էր Իսկոն պահեստայինների թվում․․․ Դուք միշտ տարօրինակ հարցեր եք տալիս։ Իսկոն մեզ համար շատ կարևոր ֆուտբոլիստ է և կմնա այդպիսին։ Նա շատ խաղերի է մասնակցել։ Կազմ ընտրելը հեշտ չէ, բայց դա իմ աշխատանք է։
Ինչ վերաբերվում է Բենզեմային ուղղված սուլոցներին՝ երկրպագուների նման վերաբերմունքը կարող է ազդել ֆուտբոլիստի վրա։ Ես հասկանում եմ դա։ Պետք է հաղթանակներ տոնենք, որպեսզի նման դեպքեր չլինեն։ Ցանկանում եմ՝ երկրպագուները մեզ աջակցեն ինչպես լավ, այնպես էլ վատ պահերին։ Ես խաղացել եմ «Սանտյագո Բեռնաբեուում» և գիտեմ՝ ինչ են նշանակում սուլոցները»,- Զիդանի խոսքերը մեջբերված են «AS.com»-ից։