Տիտո Ռամալյո. Ուրախացնում է, որ երիտասարդ ֆուտբոլիստները մրցակցելու հնարավորություն ունեն
Նմանատիպ
«Բանանցի» գլխավոր մարզիչ Տիտո Ռամալյոն ակումբի պաշտոնական կայքին տված հարազրույցում Սոչիում կայացած ուսումնամարզական հավաքի վերաբերյալ իր մեկնաբանությունն է տվել:
-Ինչպե՞ս կամփոփեք Սոչիում կայացած հավաքը: Հաջողվե՞ց անել այն ամենն, ինչ պլանավորված էր:
-Սոչիում անցկացրած մարզումները մեզ շատ բան տվեցին: Ճիշտ է՝ մի քանի օր եղանակային պայմաններն այն չէին, սակայն ընդհանուր առմամբ հաջողվեց իրագործել պլանավորվածը և մի բան էլ ավելին:
-Որքանո՞վ էին օգտակար կայացած երկու ստոգողական հանդիպումները:
-Միջմրցաշրջանային փուլի առաջին երկու հանդիպումները շատ լավ անցան: Մրցակից երկու թիմերի միջև մակարդակների մեծ տարբերություն կար: Դա մեզ հնարավորություն տվեց, որպեսզի երկու տարբեր տեսակի ֆուտբոլ խաղանք: Առաջին խաղում գերակշռում էր գնդակով և կոմբինացիոն ֆուտբոլը, իսկ երկրորդ խաղում՝ հակագրոհներով խաղը: Դա թիմին թույլ տվեց գործել տարբեր մարտավարություններով, ինչը շատ օգտակար էր մեզ համար:
-Իսպաներենում ուսումնամարզական հավաքն անվանում են concentración (հավաք, կենտրոնացում) բառով: Ի՞նչի վրա է պետք առաջին հերթին կենտրոնանալ այսպիսի հավաքների ընթացքում:
-Հավաքների իմաստը միայն մարզվելն ու խաղալը չէ: Այստեղ ֆուտբոլիստներն ապրում են միասին, նոր ֆուտբոլիստներն են գալիս, տարբեր բնավորությունների տեր մարդիկ ավելի արագ են միմյանց ընկալում և ճանաչում: Այս ամենն օգնում է որպեսզի թիմը դառնա մեկ ամբողջություն: Ֆուտբոլը միայն այն չէ, ինչ տեղի է ունենում խաղադաշտում: Դրա շուրջ տեղի ունեցողը նույնպես շատ կարևոր է:
-Նոր խաղացողների մասին: «Բանանցին» է միացել մակեդոնացի ֆուտբոլիստ Յասմին Մեցինովիչը: Ի՞նչ կասեք իր մասին:
-Նա մի քանի օր է մեզ հետ է և մարզումների ընթացքում ամեն ինչ շատ ճիշտ է անում: Նրան դեռևս ժամանակ կտանք, որպեսզի մտնի մարզումների և թիմի ռիթմի մեջ: Մեր թիմի մյուս մակեդոնացի ֆուտբոլիստը՝ Վլատկո Դրոբարովն, իրեն ամեն հարցում օգնում է, որպեսզի նա որքան հնարավոր է արագ ներգրավվի թիմին:
-Նոր լեգիեոների ժամանելը ինչպիսի՞ ազդեցություն կունենա «Բանանցի» սաների՝ հայ ֆուտբոլիստների համար:
– Մենք առաջին օրվանից նշել ենք, որ չենք եկել որևէ մեկին իր տեղից հանելու համար և մինչ այժմ էլ այդպես է: Երիտասարդ հայ ֆուտբոլիստներին մեծ ուշադրություն է դարձվում, և բոլորն էլ խաղաժամանակ ստանում են իրենց ունակությունները ցուցադրելու համար: Ֆուտբոլիստներն իրենց աշխատանքի շնորհիվ են վաստակում խաղալու հնարավորությունը: Մեկ հստակ բան կա. ֆուտբոլում ոչ ոք նվերներ չի ստանում: Ֆուտբոլում պետք է պայքարես քո տեղի համար: Ինձ ուրախացնում է, որ երիտասարդ ֆուտբոլիստները մրցակցելու և պայքարելու հնարավորություն ունեն:
-Իսպանիայում շատ եք աշխատել երիտասարդ ֆուտբոլիստների հետ: Ինչպիսի՞ որակներ ունեցող երիտասարդներն են կարողանում հաջողությունների հասնել պրոֆեսիոնալ ֆուտբոլում:
-Որպեսզի երիտասարդ ֆուտբոլիստը հաջողությունների հասնի պրոֆեսիոնալ ֆուտբոլում նրան նախ պետք է մատուցվի բոլոր տարրերը դրան հասնելու համար: Իսկ ֆուտբոլիստն առաջին հերթին պետք է ունենա ֆուտբոլային ունակություններ, բացի այդ անհրաժեշտ է մրցակցային մտածելակերպ, դեպի պրոֆեսիոնալիզմ ձգտող խաղացողը պետք է կարողանա իրեն զրկել որոշ բաներից և հասկանա, թե ինչու է դա անում: Դա հեշտ բան չէ: Մեծ ուժ և ջանքեր է պահանջում: Նաև պետք է մեկը, ով անընդհատ օգնի և սատարի: Շատ շատ են մեծ և փոքր բաղադրիչները:
-«Բանանցի» երիտասարդների մոտ տեսնու՞մ եք այդ որակները:
-Այո, ուրախ եմ, որ հնարավորություն ունեմ աշխատելու այսպիսի տաղանդավոր երիտասարդների հետ: Այս չորս ամսվա ընթացքում, ինչ Հայաստանում ենք, տեսել ենք հեռանկարային տաղանդավոր, շատ լավ որակներ ունեցող երիտասարդների: Ինչպես նաև այնպիսի խաղացողների, ում պետք է բացահայտես, որպեսզի այդ տաղանդն ավելի ակնհայտ լինի: Մենք տաղանդավոր ֆուտբոլիստներ ունենք և՛առաջին թիմում, և՛ավելի երիտասարդների մեջ, պետք է նրանց զարգացնենք և առաջ գնալու ներուժ ստեղծենք: Պետք է համբերենք և նրանց հնարավորություն տանք: Պետք է շտապողականություն չդրսևորել և շարունակել կարգապահ աշխատանքը: Շատ դրական որակներ ենք տեսնում ամեն օր նրանց հետ աշխատելիս:
-Մինչև առաջնության վերսկսելն ինչպիսի՞ հիմնական աշխատանքներ են նախատեսված:
-Թիմը պետք է շարունակի աճել, պետք է բարելավենք ֆիզիկական վիճակը, պետք է ուժեղացնենք մեր խաղային համակարգը, պետք է բարելավենք համագործակցությունն ու թիմային ոգին: Ուրախ ենք այն ամենի համար, ինչ արդեն արվել է, բայց դեռ շատ աշխատանք կա անելու:
Հետևեք մեզ նաև Telegram-ում