Ավարտվեց Բարձրագույն խմբի առաջնությունը. «Ալաշկերտը»՝ Հայաստանի չեմպիոն

Մայիսի 22-ին ավարտվեց Հայաստանի Բարձրագույն խմբի 2015-16թթ. առաջնությունը: Խաղային վերջին օրը տվեց չեմպիոնական հարցի պատասխանը:

Մրցաշարային աղյուսակի առաջատար «Ալաշկերտին» առաջնության չեմպիոն դառնալու համար անհրաժեշտ էր հաղթել «Միկային»: Աբրահամ Խաշմանյանի թիմը հասավ նպատակին՝ մրցակցի դարպասն ուղարկելով 2 անպատասխան գնդակ. աչքի ընկան Միհրան Մանասյանն ու Հեբերը:

Զուգահեռաբար ընթացող խաղերում «Շիրակը» 2:1 հաշվով առավելության հասավ «Արարատի» նկատմամբ, իսկ «Գանձասար Կապան»-«Բանանց» խաղում գոլեր չարձանագրվեցին: Գյումրու թիմի կազմում աչքի ընկան Արման Հովհաննիսյանը և Ռումյան Հովսեփյանը, իսկ «Արարատից»՝ Բենիկ Հովհաննիսյանը:

Այսպիսով, Բարձագույն խմբի առաջնության մրցաշարային աղյուսակն ունի հետևյալ վերջնական տեսքը՝

1. «Ալաշկերտ» - 55 միավոր
2. «Շիրակ» - 52
3. «Փյունիկ» - 48
4. «Գանձասար Կապան» - 45
5. «Արարատ» - 37
6. «Բանանց» - 33
7. «Միկա» - 32