Դե Խեան, Իսկոն և Մունիաինը կարող են հայտնվել բռնաբարության հետ կապված սկանդալում
Նմանատիպ
«Մանչեսթեր Յունայթեդի» դարպասապահ Դավիդ դե Խեան, «Ատլետիկի» կիսապաշտպան Իկեր Մունիաինն ու «Ռեալի» կիսապաշտպան Իսկոն կարող են մասնակցած լինել բռնաբարության։ Այդ մասին հայտնում է իսպանական «El Diario» պարբերականը՝ հստակեցնելով, որ խոսքը 2012 թվականին տեղի ունեցած դեպքի մասին է։
Հաղորդվում է, որ պոռնո-պրոդյուսեր Իգնասիո Ֆերնանդեսի միջնորդությամբ Մունիաինն ու Իսկոն հանդիպել են աղջկա հետ, որին բռնաբարել են՝ այդ ընթացքը տեսանկարահանելով։ Դե Խեան բռնաբարությանն անմիջական մասնակցություն չի ունեցել, սակայն ասել է աղջկան, որ նա սեռական հարաբերություն ունենա Իսպանիայի երիտասարդական հավաքականի իր թիմակիցների հետ, ինչպես նաև ֆիզիկական ուժ է գործադրել նրա նկատմամբ։ Կան տեղեկություններ, որ դարպասապահը ևս ցանկացել է մասնակցել էքստրեմալ տեսանյութի նկարահանմանը, սակայն այդ մասին որևէ ապացույց չկա։ Բացի այդ, խոսվում է այն մասին, որ ֆուտբոլիստներն այդ ժամանակ նաև թմրանյութ են օգտագործել։ Տեսանյութերը նկարահանվել են պոռնոգրաֆիայի նպատակով։
Նշենք նաև, որ «El Diario»-ն չի նշում Իսկոյի անունը։ Նրա մասնակցության մասին գրում է մեկ այլ պարբերական՝ «El Confidencial»-ը։ Այդ գործի առթիվ հետաքննություն է կատարվում։ Չի բացառվում, որ դրա հետ կարող են կապ ունենալ նաև այլ իսպանացի ֆուտբոլիստներ։
Հետևեք մեզ նաև Telegram-ում