Ովքե՞ր են այս անգամ տուժել «ՖԻՖԱ-ի վիրուսից»
Նմանատիպ
Ազգային հավաքականների պաշտոնական ու ընկերական խաղերը շարունակում են վնասել ակումբային ֆուտբոլին: Հոկտեմբերի 3-12-ը ԱԱ-2018-ի ընտրական փուլի խաղերի օրն էր: Հերթական անգամ բազմաթիվ ֆուտբոլիստներ այդ խաղերից և դրանց համար նախատեսված հավաքներից հետո վնասվածքներով վերադարձան իրենց ակումբներ:
Ներկայացնում ենք 11 ֆուտբոլիստների, ովքեր վերջին օրերի ընթացքում տարբեր ժամկետներով շարքից դուրս են մնացել:
Յասպեր Սիլեսեն («Բարսելոնա»)
«Բարսելոնայի» պահեստային դարպասապահ Յասպեր Սիլեսենը վնասվածք է ստացել Հոլանդիայի հավաքականի ճամբարում՝ մարզումներից մեկի ժամանակ: Բուժզննումից հետո պարզ է դարձել, որ 27-ամյա ֆուտբոլիստը բաց կթողնի 3 շաբաթ:
Ընթացիկ մրցաշրջանում հոլանդացին «կապտանռնագույների» կազմում մասնակցել է միայն մեկ հանդիպման, որում կատալոնացիները Պրիմերայի շրջանակում «Նոու Կամպ» մարզադաշտում 1:2 հաշվով զիջել են «Ալավեսին»:
Այժմ Մարկ Անդրե տեր Շտեգենը վնասվածք ստանալու իրավունք չունի: Կատալոնացիների պահեստայինների նստարանին Սիլեսենին, ամենայն հավանականությամբ, կփոխարինի Ժորդի Մասիպը:
Սերժի Ռոբերտո («Բարսելոնա»)
Ընթացիկ մրցաշրջանում «Բարսելոնայի» հիմնական աջ պաշտպանը դարձած Սերժի Ռոբերտոյի ստացած վնասվածքը համեմատաբար թեթև է: Սպասվում է, որ 24-ամյա ֆուտբոլիստը կապաքինվի առաջիկա օրերին: «Դեպորտիվոյի» հետ այսօր կայանալիք խաղը նա բաց կթողնի:
Ենթադրվում էր, որ մեկնարկային կազմում Ռոբերտոյին կփոխարինի Ալեիշ Վիդալը, սակայն Լուիս Էնրիկեն նրան կրկին չի ընդգրկել առաջիկա խաղի հայտացուցակում, իսկ այլ աջ պաշտպան «Բարսելոնան» չունի: Հավանաբար «կապտանռնագույնները» կրկին կխաղան 3 պաշտպաններով, ինչպես դա արել էին Խիխոնի «Սպորտինգի» հետ մրցավեճում (5:0):
Ժորդի Ալբա («Բարսելոնա»)
ԱԱ-2018-ի ընտրական փուլի Իտալիա – Իսպանիա խաղի (1:1) առաջին կեսում երկու թիմերի մեկական ֆուտբոլիստներ վնասվածքի պատճառով փոխարինվել են: Իսպանացիների կազմում դա «Բարսելոնայի» ձախ պաշտպան Ժորդի Ալբան էր:
Կատալոնացի ֆուտբոլիստը կապաքինվի մոտ մեկ շաբաթից:
Հավանաբար նրա փոխարեն «Դեպորտիվոյի» դեմ կխաղա Լյուկա Դինը, որը մրցաշրջանի սկզբում վատ տպավորություն չի թողել, հատկապես պաշտպանողական գործողություներում:
Ռիկարդո Մոնտոլիվո («Միլան»)
Իտալիա – Իսպանիա խաղի երկրորդ անհաջողակը Ռիկարդո Մոնտոլիվոն էր: «Միլանի» ավագի վնասվածքն ամենածանրն է հավաքականների հոկտեմբերյան խաղերի ժամանակ: Կիսապաշտպանը ստացել է խաչաձև կապանների պատռվածք, որի ապաքինման համար կպահանջվի 6 ամիս:
31-ամյա ֆուտբոլիստը մասնակցել է ընթացիկ մրցաշրջանում «ռոսոներիի» բոլոր խաղերին, իսկ հիմա թիմի մարզչական աշխատանքը նրան փոխարինողի է փնտրում։ Հնարավոր է՝ առաջիկա խաղերում «Միլանի» մեկնարկային կազմում թիմի ավագին փոխարինի 18-ամյա Մանուել Լոկատելին:
Սերխիո Ռամոս («Ռեալ»)
Մադրիդի «Ռեալի» ավագը վնասվածք է ստացել Ալբանիա – Իսպանիա հանդիպման (0:2) ժամանակ և խաղավերջում փոխարինվել է:
Ծնկի բուժզննումը ցույց է տվել, որ կապանների պատռվածք: 31-ամյա ֆուտբոլիստի վերականգնման համար պահանջվելու է 6 շաբաթ: Այդ ժամանակահատվածում Ռամոսը բաց կթողնի «արքայական ակումբի» 6 հանդիպում, ինչպես նաև Իսպանիայի ընտրանու առջիկա 2 խաղերը:
Առանց Ռամոսի «Ռեալի» հիմնական կենտրոնական պաշտպանների զույգը կկազմեն Պեպեն և Ռաֆայել Վարանը, ով ընթացիկ մրցաշրջանում առանձնապես չի տպավորում վստահ խաղով։
Կևին Ստրոտման («Ռոմա»)
Հոլանդիայի հավաքականի կիսապաշտպանը մասնակցել է ընտրական փուլի Բելառուսի ու Ֆրանսիայի հետ դիմակայություններին: Այնուամենայնիվ, 26-ամյա ֆուտբոլիստը «Ռոմային» միացել է մեջքի վնասվածքով: Վերջին օրերին հոլանդացին մարզվել է մարզասրահում:
Ա Սերիայի ընթացիկ խաղարկության 7 խաղերում կիսապաշտպանն ընդգրկված է եղել իր թիմի մեկնարկային կազմում և կարողացել է 1 գոլ խփել:
Արկադիուշ Միլիկ («Նապոլի»)
Գոնսալո Իգուայինին փոխարինելու կոչված Արկադիուշ Միլիկը ծանր վնասվածք է ստացել Լեհաստան – Դանիա մրցավեճում (3:2): 22-ամյա ֆուտբոլիստը ձախ ծնկի դիմային խաղաձև կապանների պատռվածք էր ստացել, ինչի կապակցությամբ վիրահատության է ենթարկվել:
Նախապես նշվում էր, որ Միլիկը բաց կթողնի 6 ամիս, սակայն «Նապոլիի» բժշիկն օրերս հայտարարեց, որ վերականգնման համար լեհին կպահանջվի 3-3,5 ամիս:
Ընթացիկ մրցաշրջանում հարձակվողը մասնակցել է իտալական թիմի 9 խաղի, խփել է 7 գոլ ու կատարել 1 գոլային փոխանցում:
«Նապոլին» արդեն փնտրում է հարձակվողի, որն ազատ խաղացողի կարգավիճակ ունի և կկարողանա անմիջապես պայմանագիր կնքել:
Ջորջինյո Վեյնալդում («Լիվերպուլ»)
ԱԱ-2018-ի ընտրական փուլի Հոլանդիա – Ֆրանսիա (0:1) խաղի ժամանակ Վեյնալդումը վնասվածք է ստացել և 62-րդ րոպեին ստիպված լքել է խաղադաշտը:
25-ամյա ֆուտբոլիստն ազդրի վնասվածք է ստացել: «Լիվերպուլում» հույս ունեն, որ կիսապաշտպանը կհասցնի վերականգնվել մինչ «Մանչեսթեր Յունայթեդի» հետ հոկտեմբերի 17-ին կայանալիք սկզբունքային խաղը: Հատկապես հաշվի առնելով, որ անհայտ է միջին գծում նրա մշտական խաղընկեր Ադամ Լալանայի մասնակցությունը:
ԱՊԼ-ի ընթացիկ առաջնությունում Վեյնալդումը մեկնարկային կազմում է ընդգրկված եղել «Լիվերպուլի» բոլոր 7 խաղերում և կարողացել է 7 գոլային փոխանցում կատարել:
Բակարի Սանյա («Մանչեսթեր Սիթի»)
«Հավաքականների սինդրոմն» աչքաթող չի արել նաև ԱՊԼ-ի առաջատար «Մանչեսթեր Սիթիին»: «Քաղաքայինների» աջ պաշտպան Բակարի Սանյան վնասվածք է ստացել ԱԱ-2018 ընտրական փուլի Ֆրանսիա – Բուլղարիա խաղում (4:1):
33-ամյա ֆուտբոլիստի ապաքինման համար կպահանջվի 1 ամիս: Նրա բացակայության պարագայում աջ պաշտպանի դիրքում մշտական խաղային պրակտիկա կստանա Պաբլո Սաբալետան:
Ֆրանսիացին մասնակցել էր ընթացիկ մրցաշրջանում Պեպ Գվարդիոլայի թիմի 6 հանդիպումների, որոնցում դարձել է 1 գոլային փոխանցման հեղինակ:
Անխել Դի Մարիա (ՊՍԺ)
Ֆրանսիայի չեմպիոնը ոչ միայն իր առաջատարին ուղարկեց Հարավային Ամերիկա, որպեսզի նա մասնակցի Արգենտինայի ընտրանու հանդիպումներին և հոգնած վերադառնա փարիզյան ակումբ, այլև նրան կորցրեց նվազագույնը մեկ խաղով:
28-ամյա ֆուտբոլիստը չի մասնակցի «Նանսիի» հետ առաջիկա արտագնա մրցավեճին: Ֆրանսիայի չեմպիոնները հույս ունեն, որ Չեմպիոնների լիգայի՝ «Բազելի» հետ առաջիկա մրցավեճից առաջ Դի Մարիան կհասցնի վերականգնվել:
Ֆրանսիայի ընթացիկ առաջնությում արգենտինացին դեռ գոլ չի խփել, բայց 8 խաղերում հասցրել է 3 գոլային փոխանցում կատարել:
Քվինսի Պրոմես («Սպարտակ»)
Հոլանդիա – Ֆրանսիա խաղում ևս մեկ վնասվածք գրանցվեց: «Նարնջագույնների» վինգեր Քվինսի Պրոմեսը վնասվածք ստացավ արդեն առաջին խաղակեսում և ստիպված փոխարինում խնդրեց: Մոսկվա վերադառնալուց հետո «Սպարտակի» առաջատարը բուժզննում է անցել, որից հետո պարզ է դարձել, որ լիարժեք վերականգնման համար նրան կպահանջվի 10 օր:
24-ամյա ֆուտբոլիստն ընթացիկ մրցաշրջանում շարունակում է գերարդյունավետ խաղ ցուցադրել․ Ռուսաստանի առաջնության 9 խաղում նա դարձել է 5 գոլի և 6 գոլային փոխանցման հեղինակ:
Հայկ Հովհաննիսյան
Հետևեք մեզ նաև Telegram-ում