ՏՏ ոլորտում ճանաչում ունեցող SYNERGY Internetoinal Systems ընկերությունն արդեն գրասենյակ ունի նաև Գյումրիում

Տեղեկատվական տեխնոլոգիաների ոլորտում մեծ ճանաչում ունեցող SYNERGY Internetoinal Systems /Սիներջի Ինթընեշընլ Սիսթըմզ/ ընկերությունն արդեն իր գրասենյակն ունի նաև Գյումրիում:

Հոկտեմբերի 17-ին, Գյումրու տեխնոլոգիական կենտրոնում կայացավ Սիներջի Ինթընեշընլ Սիսթըմզ ընկերության Գյումրու գրասենյակի բացման պաշտոնական արարողությունը: Բացմանը ներկա էին ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, Շիրակի մարզպետ Հովսեփ Սիմոնյանը, Գյումրու քաղաքապետ Սամվել Բալասանյանը, ՏՏ ոլորտի ներկայացուցիչներ:

1997թ.-ին հիմնադրված Սիներջի կազմակերպության գլխամասը գտնվում է Վաշինգտոնում: Ընկերությունն աշխատում է աշխարհի ավելի քան 60 երկրների հետ: Ընկերությունում ներկայումս աշխատում են շուրջ 200 բարձր որակավորում ունեցող մասնագետներ: Այն ծրագրային ապահովման և խորհրդատվական ընկերություն է, որը մշակում է տվյալների կառավարման համակարգեր՝ մոնիթորինգի և գնահատման, սոցիալական ապահովության, դատական, ֆինանսական, կրթության, առողջապահության և այլ ոլորտներում՝ ինչպես պետական և միջազգային կազմակերպությունների, այնպես էլ հասարակական և մասնավոր սեկ տորների համար: 1999 թվականից գործում է Երևանում, իսկ 2013 թվականից գործում է նաև Ստեփանակերտում՝ ներկայումս ունենալով 30 աշխատակից:

«Ոգևորությունը շատ մեծ է: Երևանում մեր ընկերությունում աշխատելու համար դիմածների մեծ մասը Գյումրիից են, և սա էր Գյումրիում ընկերությունը բացելու նախապայմանը: Սիներջիի բացումը ռազմավարական մեծ նշանակություն ունի Գյումրու ՏՏ ոլորտի զարգացման համար: Նախ և առաջ ընկերության մուտքը մեծ խթան կհանդիսանա հայաստանյան այլ ՏՏ ընկերությունների համար՝ կատարել ներդրումներ՝ նպաստելով ամենահրապուրիչ ոլորտներից մեկի զարգացմանը ՀՀ շրջաններում: Բացի այդ, Սիներջին Գյումրիում կներդնի իր տեխնո մշակույթն ու հաջողված փորձը մարզերի հետ աշխատելու հետ կապված: Աշխատանքը Գյումրիում սկսում ենք 5 ծրագրավորողներով, բայց մոտ ապագայում նախատեսում ենք ընկերությունը ընդլայնել՝ ավելացնելով աշխատողների թիվը: Սա լավ հնարավորություն է ոլորտի մասնագետների համար՝ լավագույները կմնան ու կաշխատեն Գյումրիում՝ կանխելով արտահոսքը»,- «Արմենպրես»-ի հետ հարցազրույցի ժամանակ նշեց Սիներջի Ինթընեշընլ Սիսթըմզ ընկերության նախագահ Աշոտ Հովհաննիսյանը:

Գյումրու տեխնոլոգիական կենտրոնում ներկայումս գործում են 23 կազմակերպություններ: Կենտրոնի գործունեության հիմնական ուղղությունները միտված են տեխնիկական և գործարար հմտությունների զարգացմանը և շուկայի պահանջներին համապատասխան կադրերի վերապատրաստմանը, տեխնոլոգիական նոր ընկերությունների ձևավորմանը, արտասահմանյան ներդրումների ներգրավմանը: Կենտրոնի կողմից ստեղծված տեխնոլոգիական և ինովացիոն միջավայրը Գյումրին դարձնում է գրավիչ ոչ միայն տեղական, այլև միջազգային կազմակերպությունների համար:

 Ձեռնարկությունների ինկուբատոր հիմնադրամը (ՁԻՀ) տարածաշրջանի խոշորագույն տեխնոլոգիական բիզնես ինկուբատորներից և խորհրդատվական ընկերություններից է: Հիմնադրամի կողմից իրականացվող ծրագրերը շոշափում են ՏՏ ոլորտի զարգացման յուրաքանչյուր կարևորագույն ոլորտ: ՁԻՀ-ի նպատակն է Հայաստանում ձևավորել ՏՏ ոլորտի զարգացմանը նպաստող համապատասխան միջավայր,մատչելի դարձնել միջազգային գիտելիքը և ֆինանսավորման աղբյուրները, պատրաստել բարձրակարգ ՏՏ մասնագետներ և ղեկավար աշխատուժ, տեղական ընկերությունների համար ստեղծել գլոբալ ցանցերում ընդ գրկվելու հնարավորություն: Վերոնշյալ նպատակներն իրականացվում են տարբեր նախաձեռնությունների շրջանակում, ինչպիսիք են՝ Հայ-հնդկական ՏՀՏ գերազանցության կենտրոնը, IBM Նորարար լուծումների և տեխնոլոգիաների կենտրոնը, Ազգային ճարտարագիտական լաբորատորիաներ (ANEL),Մայքրոսոֆթ ինովացիոն կենտրոնը, Գյումրու և Վանաձորի տեխնոլոգիական կենտրոնները, Մոբայլ լուծումների տարածաշրջանային լաբորատորիան (mLab ECA) և այլն: