Ռոնալդուն հանդիպել է երկրպագուի հետ, ով կոմայից դուրս է եկել իր հեթ-տրիկից հետո (տեսանյութ)

«Ռեալի» հարձակվող Կրիշտիանու Ռոնալդուն Չեմպիոնների լիգայի խմբային փուլի չորրորդ տուրի՝ «Լեգիայի» հետ հանդիպումից առաջ հանդիպել է Դավիդ Պավլաշչիկի հետ, ով 2013 թվականին կոմայից դուրս է եկել պորտուգալացի ֆուտբոլիստի՝ Շվեդիայի դեմ խաղում ձևակերպած հեթ-տրիկից հետո։

2013 թվականի նոյեմբերի 19-ին Պորտուգալիայի հավաքականը Մունդիալ-2014-ի ընտրական փուլի անցումային խաղում Ռոնալդուի հեթ-տրիկի շնորհիվ 3։2 հաշվով հաղթանակ տոնեց Շվեդիայի նկատմամբ: Կրիշտիանուի վերջին գոլից հետո Դավիդը դուրս է եկել կոմայից։ Երիտասարդ երկրպագուն դրանից 3 ամիս առաջ ավտովթարի հետևանքով է հայտնվել կոմայում։

Լեհաստանում «Լեգիայի» հետ կայանալիք խաղը Կրիշտիանու Ռոնալդուին հնարավորություն է տվել երկրորդ անգամ հանդիպելու իր երկրպագուի հետ։ Տեղյակ լինելով այդ պատմության մասին՝ Ռոնալդուն դեռևս 2014 թվականին Դավիդ Պավլաշչիկին հրավիրել էր Դորտմունդի «Բորուսսիայի» հետ Չեմպիոնների լիգայի շրջանակում կայացած հանդիպմանը։