Այսօր կկայանան Չեմպիոնների լիգայի և Եվրոպա լիգայի 1/4 եզրափակիչների վիճակահանությունները

Այսօր Շվեյցարիայի Նյոն քաղաքում գտնվող ՈւԵՖԱ-ի գրասենյակում կայանալու է Չեմպիոնների լիգայի և Եվրոպա լիգայի 2016-2017թթ․ խաղարկությունների 1/4 եզրափակիչների վիճակահանությունը։ Չեմպիոնների լիգայի վիճակահանությունը մեկնարկելու է Երևանի ժամանակով 15։00-ին, Եվրոպա լիգայինը՝ 16։00-ին։

Չեմպիոնների լիգայի 1/4 եզրափակիչ են դուրս եկել՝

• «Ատլետիկո» (Իսպանիա)
• «Բավարիա» (Գերմանիա)
• «Բարսելոնա» (Իսպանիա)
• «Բորուսսիա Դորտմունդ» (Գերմանիա)
• «Լեսթեր» (Անգլիա)
• «Մոնակո» (Ֆրանսիա)
• «Ռեալ» (Իսպանիա, գործող գավաթակիր)
• «Յուվենտուս» (Իտալիա)

1/4 եզրափակչի զույգերը կազմվելու են «կույր վիճակահանության» արդյունքում։ Այս փուլում կարող են հանդիպել միևնույն ֆուտբոլային ասոցիացիան ներկայացնող թիմերը։ Այն թիմը, որի անունը զամբյուղից առաջինը կհանեն, առաջին հանդիպումը կանցկացնի սեփական հարկի տակ։ 1/4 եզրափակչի առաջին խաղերը կկայանան ապրիլի 11-ին և 12-ին, պատասխան հանդիպումները՝ ապրիլի 18-ին և 19-ին։ Արդեն ապրիլի 21-ին նախատեսված է անցկացնել կիսաեզրափակչի վիճակահանությունը։

Եվրոպա լիգայի 1/4 եզրափակչում խաղալու են՝

• «Անդերլեխտ» (Բելգիա)
• «Այաքս» (Հոլանդիա)
• «Բեշիկթաշ» (Թուրքիա) 
• «Գենկ» (Բելգիա)
• «Լիոն» (Ֆրանսիա)
• «Մանչեսթեր Յունայթեդ» (Անգլիա)
• «Սելտա» (Իսպանիա)
• «Շալկե 04» (Գերմանիա)

Եվրոպա լիգայի 1/4 եզրափակչի վիճակահանության հետ կապված ևս սահմանափակումներ չկան։ Այս դեպքում ևս այն թիմը, որի անունն առաջինը կհանեն զամբյուղից, առաջին խաղը կանցկացնի սեփական դաշտում։ Այս փուլի առաջին հանդիպումները կկայանան ապրիլի 13-ին, պատասխան խաղերը՝ ապրիլի 20-ին։