Որտե՞ղ են հիմա «Ոսկե տղաները»

2003 թվականից ֆուտբոլային աշխարհում ավելացել է անհատական մրցանակների թիվը: «Golden Boy» մրցանակը շնորհվում է ամենատաղանդավոր երիտասարդ ֆուտբոլիստներին: Քանի դեռ նոր հերոսի անունն անհայտ է, եկեք հայացք գցենք անցյալին ու տեսնենք, թե նախորդ տարիներին մրցանակը ստացած ֆուտբոլիստները որտեղ են հիմա:

2003թ. Ռաֆայել վան դեր Վարտ (Հոլանդիա. «Այաքս»)

Ինչի՞ համար է մրցանակ ստացել

Հոլանդացի ֆուտբոլիստն «Այաքսում» ցուցադրած հիանալի խաղի համար է մրցանակին արժանացել: «Golden Boy»-ին 20 տարեկանում արժանանալու ժամանակ նա արդեն հասցրել էր ծնկի երկու վիրահատության ենթարկվել, ապա դաշտ վերադառնալ ու կատարելագործվել։

Ի՞նչ է տեղի ունեցել դրանից հետո

Այդ պահից ծաղկել է վան դեր Վարտի կարիերան: Նա հիանալի ելույթներ է ունեցել «Համբուրգում», «Ռեալում», «Տոտենհեմում», նորից «Համբուրգում», ապա «Ռեալ Բետիսում»: 

Ի՞նչ է անում հիմա

Ռաֆայելը 34 տարեկան է և խաղում է Դանիայի առաջնությունում: Հոլանդացին հանդես է գալիս «Միդտյուլանում»:

2004թ. Ուեյն Ռունի (Անգլիա և « Էվերթոն»/«Մանչեսթեր Յունայթեդ»)

Ինչի՞ համար է մրցանակ ստացել

«Էվերթոնի», ապա նաև «Մանչեսթեր Յունայթեդի» կազմում ելույթների, ինչպես նաև 2004 թվականի Եվրոպայի առաջնության գոլերի համար: 

Ի՞նչ է տեղի ունեցել դրանից հետո

Ուեյնը դարձել է «Մանչեսթեր Յունայթեդի» լեգենդը, ակումբի և Անգլիայի ընտրանու պատմության լավագույն ռմբարկուն:

Ի՞նչ է անում հիմա

31-ամյա Ռունին շարունակում է խաղալ մանչեսթերյան ակումբում, թեև Ժոզե Մոուրինյուն այնքան էլ չի վստահում նրան: Շատ հավանական է, որ ամռանը Ռունին այլ ակումբ կտեղափոխվի:

2005թ. Լեոնել Մեսսի (Արգենտինա և «Բարսելոնա»)

Ինչի՞ համար է մրցանակ ստացել

Եթե «Golden Boy» մրցանակը հանձնելուց առաջ ֆուտբոլիստների մասին որևէ բան ասեին, ապա Մեսսիի մասին հետևյալը կհնչեր. «Լավագույն հեռանկարի և լավագույն ֆուտբոլիստների ցուցակում ընդգրկվելու պատրաստվածության համար»: Մրցանակին արժանանալու պահին Մեսսին թիմի հիմնական կազմում չէր, բայց պարզ էր, որ նա մեծ ֆուտբոլիստ էր դառնալու:

Ի՞նչ է տեղի ունեցել դրանից հետո

Յուրահատուկ ոչինչ… Մեսսին 5 «Ոսկե գնդակ» է ստացել ու բազմաթիվ գավաթներ նվաճել «Բարսելոնայի» հետ: Հավաքականում ոչ մի հաջողություն դեռևս չունի:

Ի՞նչ է անում հիմա

Հայտնի չէ, թե որտեղ է 🙂

2006թ. Սեսկ Ֆաբրեգաս (Իսպանիա և «Արսենալ»)

Ինչի՞ համար է մրցանակ ստացել

19-ամյա կիսապաշտպանը հեշտությամբ կազմակերպում էր «Արսենալի» խաղն այնպես, ասես ոչ թե երեկվա դպրոցական էր, այլ կայացած վարպետ: 17 տարեկանից թիմի հիմնական կազմում էր ու կարելի է ասել, որ մրցանակը ստանալու պահին արդեն կայացած ֆուտբոլիստ էր:

Ի՞նչ է տեղի ունեցել դրանից հետո

Ֆաբրեգասը «Բարսելոնա» տեղափոխվեց ու սկսեց տիտղոսներ նվաճել: Իսպանիայի հավաքականի կազմում դարձավ Աշխարհի ու Եվրոպայի երկակի չեմպիոն: 2014-ին վերադարձավ Անգլիա ու հիմա ուժերը «Չելսիում» է կենտրոնացրել:

Ի՞նչ է անում հիմա

Պատրաստվում է կարիերայում երկրորդ անգամ Անգլիայի չեմպիոն դառնալ:

2007թ. Սերխիո Ագուերո (Արգենտինա և «Ատլետիկո»)

Ինչի՞ համար է մրցանակ ստացել

19 տարեկանում արդյունավետ խաղացել է «Ատլետիկոյի» կազմում, պարբերաբար հանդես եկել Արգենտինայի հավաքականում:

Ի՞նչ է տեղի ունեցել դրանից հետո

«Ատլետիկոյի» հետ հաղթել է Եվրոպա լիգան և ՈւԵՖԱ-ի Սուպերգավաթը: Դրանից հետո տեղափոխվել «Մանչեսթեր Սիթի»: Անգլիայի երկակի չեմպիոն է դարձել և համարվում է ԱՊԼ-ի ամենաարդյունավետ հարձակվողներից մեկը: 

Ի՞նչ է անում հիմա

Չնայած որոշ ժամանակ տեղը զիջեց Գաբրիել Ժեզուշին՝ հիմա կրկին կանոնավոր խաղում է և փորձում կասկածի տակ չդնել իր վարպետությունը։

2008թ. Անդերսոն (Բրազիլիա և «Մանչեսթեր Յունայթեդ»)

Ինչի՞ համար է մրցանակ ստացել

«Մանչեսթեր Յունայթեդի» հիմնական կազմի խաղացող էր ու հաղթել է Չեմպիոնների լիգայում, վաստակել անձամբ սըր Ալեքս Ֆերգյուսոնի վստահությունը: 

Ի՞նչ է տեղի ունեցել դրանից հետո

Փորձել է դառնալ «Մանչեսթեր Յունայթեդի» համար կարևոր խաղացող, բայց անկախ 180 խաղից, չի արդարացրել սպասելիքները: Անհաջողությամբ է ավարտել «Ֆիորենտինայում» վարձավճարի դիմաց ելույթները և վերադարձել հայրենիք:

Ի՞նչ է անում հիմա

Մի քանի տարի «Ինտերնասիոնալեում» խաղալուց հետո տեղափոխվել է «Կորբիտիբա»:

2009թ. Ալեշանդրե Պատո (Բրազիլիա և «Միլան»)

Ինչի՞ համար է մրցանակ ստացել

Կարճ՝ փայլել է «Միլանի» կազմում:

Ի՞նչ է տեղի ունեցել դրանից հետո

Լքել է «Միլանը» և ռմբարկուական ձիրքերը կատարելագործելու նպատակով հայրենիք վերադարձել, բայց ձախողելով վարձավճարի դիմաց «Չելսի» տեղափոխվել, ոչնչի չհասնելով` ելույթները շարունակել «Վիլյառեալում»:

Ի՞նչ է անում հիմա

Ձմռանը տեղափոխվել է Չինաստան: Հիմա 27 տարեկան է:

2010թ. Մարիո Բալոտելլի (Իտալիա և «Ինտեր»/«Մանչեսթեր Սիթի»)

Ինչի՞ համար է մրցանակ ստացել

Ցուցադրել է լավագույն կարողությունները, «Ինտերի» հետ հաղթանակներից հետո տեղափոխվել «Մանչեսթեր Սիթի»:

Ի՞նչ է տեղի ունեցել դրանից հետո

Ոչինչ չտվող փորձություններ Անգլիայում և Իտալիայում:

Ի՞նչ է անում հիմա

Փորձում է վերակառուցել կարիերան և հեղինակությունը «Նիցայում»: Առաջինը գուցե տեղի ունենա, երկրորդը ֆանտաստիկայի ժանրից է:

2011թ. Մարիո Գյոտցե. (Գերմանիա և «Բորուսսիա» Դորտմունդ)

Ինչի՞ համար է մրցանակ ստացել

Նա Եվրոպայի լավագույն ակումբներից մեկի կարևորագույն խաղացողներից էր: Մրցանակ նրան Բունդեսլիգայի հաղթանակն ու Գերմանիայի հավաքականում խփած գոլերն են շնորհել:

Ի՞նչ է տեղի ունեցել դրանից հետո

Գյոտցեն Աշխարհի չեմպիոն է դարձել, արգենտինացիների դեմ խաղի հաղթական գոլը խփել, տեղափոխվել «Բավարիա» և հետ վերադարձել Դորտմունդ:

Ի՞նչ է անում հիմա

«Բորուսսիայի» կազմում է, կազդուրվում է նյութափոխանակության խանգարումներից։

2012թ. Իսկո (Իսպանիա և «Մալագա»)

Ինչի՞ համար է մրցանակ ստացել

«Մալագայում» խելացի ու լավ խաղի համար:

Ի՞նչ է տեղի ունեցել դրանից հետո

Տեղափոխվել է «Ռեալ», որի հետ 2 անգամ հաղթել Չեմպիոնների լիգայում։

Ի՞նչ է անում հիմա

«Ռեալում» է, ցանկանում է ավելի շատ խաղալ, առաջնորդ լինել: Գործող պայմանագիրն ուժը կկորցնի 2018-ին, բայց մադրիդյան ակումբում հույս ունեն, որ ֆուտբոլիստը կհամաձայնի ավելի երկար մնալ:

2013թ. Պոլ Պոգբա (Ֆրանսիա և «Յուվենտուս»)

Ինչի՞ համար է մրցանակ ստացել

Թուրինում գրանցած առաջընթացի համար:

Ի՞նչ է տեղի ունեցել դրանից հետո

«Յուվենտուսի» հետ մի քանի անգամ հաղթել է ներքին առաջնությունում, պարտվել 2 կարևոր եզրափակչում՝ Չեմպիոնների լիգայի և  Եվրոպայի առաջնության: Անցյալ ամառ տեղափոխվել է «Մանչեսթեր Յունայթեդ» ու դարձել պատմության ամենաթանկարժեք ֆուտբոլիստը:

Ի՞նչ է անում հիմա

Փորձում է արդարացնել սպասելիքները, բայց նա հրաշագործ չէ:

2014թ. Ռահիմ Սթերլինգ (Անգլիա և «Լիվերպուլ»)

Ինչի՞ համար է մրցանակ ստացել

Քամու արագությամբ մեծ ֆուտբոլում հայտնվելու և «Լիվերպուլի» գրոհող ուժերից մեկ դառնալու համար։

Ի՞նչ է տեղի ունեցել դրանից հետո

Մեծ գումարի դիմաց «Մանչեսթեր Սիթի» տեղափոխվեց և դարձավ Անգլիայի հավաքականի ամենաքննադատվող խաղացողներից մեկը:

Ի՞նչ է անում հիմա

«Մանչեսթեր Սիթիում» կատարում է Գվարդիոլայի պահանջները: 22 տարեկան է:

2015թ. Անտոնի Մարսյալ (Ֆրանսիա և «Մանչեսթեր Յունայթեդ»)

Ինչի՞ համար է մրցանակ ստացել

«Մոնակոյում» գրանցած առաջընթացի, ապա ներկայիս ակումբ տեղափոխվելու համար։

Ի՞նչ է տեղի ունեցել դրանից հետո

Վառ մեկնարկ նոր թիմում:

Ի՞նչ է անում հիմա

Ժոզե Մուրինյուի օրոք հարձակման գծի ֆուտբոլիստներն ավելի քիչ խաղաժամանակ են ստանում, քան կցանկանային: Նա դեռ Մանչեսթերում է, բայց պետք է շարունակի մտածել կարիերայի մասին:

2016թ. Ռենատու Սանշեշ (Պորտուգալիա և «Բենֆիկա»/«Բավարիա»)

Ինչի՞ համար է մրցանակ ստացել

«Բենֆիկայի» կազմում դիտարժան խաղի, Եվրո-2016-ի հաղթանակի ու «Բավարիա» տեղափոխվելու համար:

Ի՞նչ է տեղի ունեցել դրանից հետո

Պայքարում է «Բավարիայի» կազմում դաշտ դուրս գալու համար։ Դեռ լիովին չի հասել նպատակին:

Ի՞նչ է անում հիմա

Սպասում է Խաբի Ալոնսոյի կարիերայի ավարտին և հույս ունի, որ դրանից հետո կդառնա «Բավարիայի» հիմնական կազմի ֆուտբոլիստ:

Հետևեք մեզ նաև Telegram-ում