Օսեյան. Ամենակարևոր խաղն ամենավատը ստացվեց
Նմանատիպ
Հայաստանի գավաթի խաղարկության եզրափակչում «Շիրակից» 0:3 հաշվով կրած պարտության պատճառով Փյունիկի» գլխավոր մարզիչ Արտակ Օսեյանը դժգոհ էր իր թիմի խաղից:
«Ամենակարևոր խաղն էր, բայց ամենավատը ստացվեց»,- հանդիպումից հետո ասաց մարզիչը։
Sport.Times.am–ը երիտասարդ մասնագետին խնդրեց մանրամասնել անհաջողության պատճառները.
«Կարծում եմ՝ պատճառը հոգեբանության մեջ էր: Էմոցիոնալ այդքան սառը չեմ, որ ճիշտ վերլուծեմ կատարվածը, բայց ըստ իս, պատճառը դա էր: Երևի դեռ այդքան չենք հասունացել նման կարևոր խաղում ավելի սառնասիրտ լինելու համար»:
Առաջին երկու գոլերը երևանցիները բաց թողեցին հեռահար փոխանցումներից հետո: Sport.Тimes.am–ն Օսեյանին հարցրեց արդյո՞ք մրցակցի նման խաղն անակնկալ էր նրանց համար.
«Անսպասելի չէր: Լավ գիտեինք նրանց խաղը, առաջին անգամ չէինք խաղում: Մարզումների ժամանակ ու խաղից առաջ դրա վրա ուշադրություն դարձրել էինք: Պարզապես ստացվեց այնպես, ինչպես ստացվեց…»
Հարց հնչեց, թե արդյո՞ք անհատական սխալները նույնպես հոգեբանության հետ էին կապված.
«Ոչ միայն հոգեբանության: Վերջիվերջո նա (Արթուր Քարտաշյանը-խմբ.) սայթաքեց, բոլորի հետ էլ պատահում է: Դրան մի փոքր դժվար է գնահատական տալ»:
Բարձրագույն խմբի նախորդ տուրում «Փյունիկը» մեկնարկային կազմով խաղաց «Գանձասար-Կապանի» հետ, սակայն 30-ամյա մասնագետը խնդիրը հոգնածության հետ չկապեց.
«Եթե գոլեր ընդունեինք խաղի վերջում, կասեի, որ այդպես է, բայց 35-րդ րոպեին 3 գոլ էինք բաց թողել, դա հոգնածության հետ չեմ կապում»:
Առաջին կեսից հետո հաշիվն արդեն 0:3 էր: Օսեյանն ասեց, թե որքան դժվար էր ընդմիջման ժամանակ ոգևորել իր սաներին․
«Շատ դժվար էր: Թիմին ընդամենը կարճ բան ասացի՝ դուրս ենք գալիս հանձնված կամ պայքարելու մեր անվան համար»:
Երկրորդ կեսի վերաբերյալ գնահատականի վերաբերյալ մարզիչը միայն ասաց.
«Այսօր ընդհանրապես ոչնչից գոհ չեմ»:
Հայկ Հովհաննիսյան
Հետևեք մեզ նաև Telegram-ում