«Յուվենտուսն» այլևս հետաքրքրված չէ Վերատիի ծառայություններով

«Յուվենտուսի» գործադիր տնօրեն Ջուզեպե Մարոտան հայտարարել է, որ թուրինյան ակումբն այլևս հետաքրքրված չէ «Պարի Սեն Ժերմենի» կիսապաշտպան Մարկո Վերատիի ծառայություններով։ Թուրինյան ակումբը չի պատրաստվում 24-ամյա ֆուտբոլիստի տրանսֆերի համար խոշոր գումար վճարել։

-Գնահատելով հավանական գործարքի բոլոր կողմերը, պահանջները՝ կարող ենք հայտարարել, որ հետաքրքրված չենք Վերատիի ծառայություններով։ Մենք, բնականաբար, չենք պատրաստվում նրա համար 100 միլիոն եվրո վճարել,- Մարոտայի խոսքը փոխանցում է «Football Italia»-ն։

Մարկո Վերատին «Պարի Սեն Ժերմենի» ղեկավարությանն արդեն հայտնել է ակումբը փոխելու մտադրության մասին։ Քանի որ Վերատիի գործող պայմանագիրը նախատեսված է մինչև 2021 թվականը, փարիզյան ակումբը չի պատրաստվում տրանսֆերային ցածր արժեք սահմանել։ Հիշեցնենք, որ Մարկո Վերատիի ծառայություններով հետաքրքրված է նաև «Բարսելոնան»։