Ռոստոմյան. Թյուր կարծիք է, թե Հայաստանում խաղային մարզաձևերը զարգացնել հնարավոր չէ
Նմանատիպ
Հայաստանի բասկետբոլի ֆեդերացիայի նախագահ Հրաչյա Ռոստոմյանն այսօր ԶԼՄ-ների հետ հանդիպման ժամանակ գնահատել է բասկետբոլի Եվրոպայի «C» դիվիզիոնի առաջնությունում Հայաստանի մինչեւ 16 տարեկան տղաների և աղջիկների մասնակցությունը: Նա նաև խոսել է Հայաստանում խաղային մարզաձևերի զարգացման հնարավորության մասին.
«Հայկական բասկետբոլն այս տարի Եվրոպայի պատանեկան առաջնությանը մասնակցեց հինգ թիմով: Դուք գիտեք, որ մինչև 18 տարեկան աղջիկները նաև արծաթե մեդալ նվաճեցին, իսկ երեկ մեր Մ-16 տղաներն ու աղջիկները դարձան չեմպիոն:
Այս ամենը ցույց է տալիս, որ մենք ճիշտ ուղղությամբ ենք ընթանում: Եթե նայեք վերջին երեք տարիների պատմությունը, կտեսնեք, որ Եվրոպայի առաջնություններում մեր թիմերի և´ քանակն է ավելանում և´ մեդալների թիվը:
Մեզանում թյուր կարծիք կա, թե մենք ուժեղ ենք միայն մենապայքարային մարզաձևերում, թե մեզ մոտ թիմային պայքարը չի ստացվում, չենք կարողանում համախմբվել: Այս խնդիրը, թե հնարավո՞ր է Հայաստանում խաղային մարզաձեւերը զարգացնել և ինչպե՞ս, քննարկել ենք ՀԱՕԿ նախագահ Գագիկ Ծառուկյանի հետ: Եվ սա ապացույց է, որ հնարավոր է: Դրա համար պետք են իրենց գործին քաջատեղյակ մասնագետներ, որոնք սրտացավ են, և որ ամենակարևորն է, պետք է ուշադրություն դարձնել յուրաքանչյուր մարզիկի վրա:
Դա հեշտ չէ: Մեր ֆեդերացիայի փորձից եմ ասում: Մենք մեծ ու դժվարին ճանապարհ անցանք: Այս երեք տարիների քրտնաջան աշխատանքը մեզ հնարավորություն տվեց նաևառաջին անգամ ազգային հավաքականի մակարդակով մասնակցել աշխարհի առաջնության խմբային փուլին, ինչը բասկետբոլում շատ բարդ է», – Ռոստոմյանի խոսքերն է մեջբերում ՀԱՕԿ-ի պաշտոնական կայքը:
Հետևեք մեզ նաև Telegram-ում