«Ռեալը»՝ աշխարհում ամենաթանկ կազմ ունեցող ակումբ

Մադրիդի «Ռեալն» աշխարհում ամենաթանկ կազմն ունեցող ֆուտբոլային ակումբն է։ Այս մասին հաղորդում է «Marca» պարբերականը՝ հղում կատարելով մասնագիտացված «Transfermarkt.de» կայքի տվյալներին։

«Ռեալի» ընդհանուր կազմի արժեքը գնահատվում է 774 միլիոն եվրո, ինչը 37 միլիոն եվրոյով ավելի է «Բարսելոնայի» կազմի արժեքից և 130 միլիոն եվրոյով ավելի լավագույն եռյակը եզրափակող «Չելսիի» կազմի արժեքից։

«Մանչեսթեր Սիթիի» կազմը գնահատվում է 588,75 միլիոն եվրո։ Լավագույն հնգյակում է «Բավարիան» (581.4 միլիոն եվրո)։ Ուշագրավ է, որ տրանսֆերային շուկայի ամենաակտիվ ակումբներից մեկը՝ «Մանչեսթեր Յունայթեդը» ունի ընդհանուր 567․75 միլիոն եվրո արժողությամբ կազմ։ Լավագույն տասնյակում կա նաև Ա Սերիայի ներկայացուցիչ՝ «Յուվենտուսը» (538.6 միլիոն եվրո), իսկ ահա տրանսֆերային շուկայում իսկական իրարանցում առաջացրած «Պարի Սեն Ժերմենը» 8-րդ հորիզոնականում է՝ 521․15 միլիոն եվրո։ Փարիզյան թիմին հաջորդում է «Ատլետիկոն» (511 միլիոն եվրո), իսկ տասնյակը եզրափակում է «Տոտենհեմը» (505.25 միլիոն եվրո)։

Կրիշտիանու Ռոնալդուն շարունակում է մնալ «Ռեալի» գլխավոր աստղը։ Նրա տրանսֆերը գնահատվում է 100 միլիոն եվրո։ Պորտուգալացուն հաջորդում է Գարեթ Բեյլը՝ 80 միլիոն եվրո (նախորդ մրցաշրջանի համեմատ ուելսեցու տրանսֆերային արժեքը նվազել է 10 միլիոն եվրոյով), իսկ եռյակը եզրափակող կիսապաշտպան Թոնի Կրոսի տրանսֆերը գնահատվում է 70 միլիոն եվրո։

Վերոնշյալ աղբյուրը գրում է, որ մադրիդյան թիմի 23 ֆուտբոլիստներից միայն երկուսի տրանսֆերային արժեքն է նվազել նախորդ մրցաշրջանի համեմատ՝ Գարեթ Բեյլ և Լուկա Մոդրիչ։ Միևնույն ժամանակ 11 ֆուտբոլիստի տրանսֆերային արժեք բարձրացել է։ «Սերուցքայինների» մեկ ֆուտբոլիստի միջին արժեքը 32․34 միլիոն եվրո է, իսկ 9 ֆուտբոլիստի տրանսֆերային արժեք գերազանցում է այս թիվը։

Ուշագրավ է նաև, որ «Ռեալի» կազմի միջին տարիքը 25․3 է։ Մադրիդյան ակումբում շարունակում են ուշադրություն դարձնել երիտասարդ կադրերին, ինչի վկայությունն են ամռանը թիմին միացած Սեբալյոսը, Թեոն, ինչպես նաև վարձավճարից վերադարձած Լյորենտեն, Վալյեխոն, Մայորալը։