Նադալը ստիպված լքել է Ամփոփիչ մրցաշարը

Աշխարհի առաջին թենիսիստ Ռաֆայել Նադալը չի շարունակելու ելույթները տարվա Ամփոփիչ մրցաշարում: Այդ մասին տեղեկանում ենք BBC Sport-ից։

Խմբային փուլի առաջին տուրում իսպանացին պարտվել է Դավիդ Գոֆենին (6:7, 7:6, 4:6), ինչից հետո հայտարարել է, որ ծնկի վնասվածքի պատճառով չի կարողանա մասնակցել մյուս հանդիպումներին:

«Այդ որոշումը կայացրեցի հենց խաղի ժամանակ: Մրցաշարը կլքեի, եթե նույնիսկ հաղթեի Գոֆենին: Այսպիսի հիանալի մրցաշրջանից հետո արժանի չեմ կորտ դուրս գալ ցավերով ու առանց հաճույքի»,- ասել է Ռաֆան:

Ամփոփիչ մրցաշարում Նադալին փոխարինելու է նրա հայրենակից Պաբլո Կարենո Բուստան: