5 ակումբներ, որոնք նոր տրանսֆերների կարիք ունեն
Նմանատիպ
Ձմեռային տրանսֆերային պատուհանն այնքան էլ հարմար ժամանակահատված չէ լավ տրանսֆերներ կատարելու համար, սակայն կան մի քանի եվրոպական ակումբներ, որոնք այս պահին անհապաղ տրանսֆերների կարիք ունեն: Sport Times-ը վերլուծել է այդ ակումբների շուրջ ստեղծված իրավիճակը:
«Ռեալ»
Մադրիդի «Ռեալի» խնդիրները սկսվեցին նախորդ տրանսֆերային պատուհանի ժամանակ, երբ թիմից հեռացան Ալվարո Մորատան, Խամես Ռոդրիգեսը և Պեպեն: Մադրիդյան ակումբն այդպես էլ չկարողացավ նրանց համարժեք փոխարինողներ գտնել: Հատկանշական է այն, որ այս 3 ֆուտբոլիստներն էլ տարբեր դիրքերի խաղացողներ են՝ պաշտպան, կիսապաշտպան, հարձակվող: Այս բոլոր դիրքերում «Ռեալը» թուլացել է:
Դարպասապահի դիրքի համար մադրիդցիները վաղուց փնտրտուքների մեջ են։ Դավիդ Դե Խեա, Կուրտուա, Դոնարումա. այս դարպասապահներին ձեռք բերելու բոլոր փորձերն ապարդյուն եղան, սակայն իսպանական ԶԼՄ-ների տեղեկություններով՝ արդեն այս տրանսֆերային պատուհանի ընթացքում «Ռեալը» ձեռք կբերի «Ատլետիկի» դարպասապահ Կեպա Արիսաբալագային: Այնուամենայնիվ, մադրիդցիները պետք է ուժեղացնեն պաշտպանության և հարձակման կենտրոնը:
«Բարսելոնա»
Կատալոնական ակումբն արդեն կատարեց իր պատմության խոշորագոյւն տրանսֆերը և ամրապնդեց դաշտի կենտրոնը: Այժմ առանցքային դիրքը պաշտպանությունն է: Եթե Խավիեր Մասկերանոն հեռանա, ապա «Բարսան» անհապաղ պետք է փոխարինող գտնի նրան: Ճիշտ է, կենտրոնական պաշտպանների հիմնական զույգը կկազմեն Պիկեն և Ումտիտին, սակայն Վալվերդեն պետք է այլընտրանքային տարբերակ ունենա: Վնասվածքների և որակազրկումների արդյունքում թեկուզ մի խաղում թուլանալը կարող է ծանր հետևանքներ ունենալ կատալոնացիների համար: Թիմը պայքարում է մի քանի ճակատով և հույսը դնել միայն Ումտիտի/Պիկե զույգի վրա, այդքան էլ ճիշտ չի լինի: Ինչպես նաև, լավ գաղափար չէ հույսը Թոմաս Վերմալենի վրա դնելը: Բելգիացին կայուն խաղ չի ցուցադրում և կարելի ասել՝ չի համապատասխանում «Բարսելոնայի» մակարդակին:
«Մանչեսթեր Յունայթեդ»
Այն, որ Մոուրինյուն տրանսֆերի կարիք ունի, պարզից էլ պարզ է: Պորտուգալացին հրապարակավ խոսել է այդ մասին, սակայն ՄՅՈւ-ում բացառությամբ հարձակման դիրքի, մնացած գոտիներում ֆուտբոլիստների պակաս չի զգացվում: Այնպես որ, գնելուց առաջ, նախ պետք է վաճառել: Եվ հետո, հստակ չէ, որ նորեկներն ավելի լավը կլինեն ներկայիս ֆուտբոլիստներից: Մոուրինյուին պետք են աթլետներ՝ ֆիզիկապես լավ պատրաստված: Նա այնքան էլ չի գնահատում ֆուտբոլիստի տեխնիկան: Միակ դիրքը, որտեղ ՄՅՈւ-ն կարող է խնդիրներ ունենալ՝ կենտրոնական հարձակվողի դիրքն է: Լուկակուն գրեթե առանց փոխարինման է խաղում, իսկ Իբրահիմովիչը նորից վնասվածք է ստացել:
«Նապոլի»
«Նապոլին» երկար դադարից հետո վերջապես ռեալ շանսեր ունի չեմպիոնությունը նվաճելու համար: Պետք է օգտագործել այս տրանսֆերային պատուհանը թիմի կազմն ամրապնդելու համար: «Նապոլին» այն թիմերից է, որոնք խաղում են 14-15 ֆուտբոլիստով: Այսինքն՝ ռոտացիայի հնարավորություն չկա: Նման դեպքերում, եթե ֆուտբոլիստներից մեկը վնասվածք է ստանում, ապա քանդվում է ամբողջ թիմը:
Նեապոլցիների համար առաջնային է կենտրոնական հարձակվողի դիրքն ամրապնդելը: Արկադիուշ Միլիկը դեռ չի ապաքինվել վնասվածքից և Մաուրիցիո Սարրին միանշանակ ուրախ կլինի նոր կենտրոնական հարձակվող ունենալ:
Եվ վերջում, չմոռանանք նաև հայկական ֆուտբոլի մասին
«Ալաշկերտ»
Մեր գործող չեմպիոնն ու ընթացիկ մրցաշրջանի առաջատար «Ալաշկերտը» կփորձի ուժեղացնել կազմը ձմեռային տրանսֆերային պատուհանի ընթացքում: Երևանյան ակումբը համագործակցելու է բրազիլական երկու հանրահայտ ակումների՝ «Ֆլումինենսեի» և «Բոտաֆոգոյի» հետ: Հնարավոր է, որ «Ալաշկերտում» բրազիլացի նորեկներ լիեն, ինչը չի կարող չուրախացնել հայկական ֆուտբոլի երկրպագուներին: Այո, ոչ թե միայն «Ալաշկերտի», այլ նաև ամբողջ հայկական ֆուտբոլի երկրպագուներին: Ընդամենը մի քանի ամիս առաջ, «Ալաշկերտին» մի քայլ էր բաժանում Չեմպիոնների լիգայի որակավորման 3-րդ փուլից: Այս պահի դրությամբ, միայն մեր գործող չեմպիոնը կարող է համարձակվել և փորձ կատարել հայտնվելու ՉԼ-ի որակավորման 3-րդ փուլում: Ճիշտ է, դրա համար նախ պետք է դառնալ Հայաստանի չեմպիոն, ապա անցնել ՉԼ-ի որակավորման 1-ին փուլը: Այնուամենայնիվ, մի քանի լավ տրանսֆերներ կատարելու դեպքում, երևանյան ակումբը կարող է մեծացնել շանսերը պատմություն կերտելու համար:
Միհրան Ալեքսանյան
Հետևեք մեզ նաև Telegram-ում