Հայաստանի առաջնություն. Առաջատարը չի փոխվել
Նմանատիպ
Երեկ տեղի ունեցան շախմատի Հայաստանի տղամարդկանց առաջնության 5-րդ տուրի պարտիաները: Ի տարբերություն նախորդ 2 տուրերի, որոնցում գրանցվել էին միայն մեկական հաղթական պարտիաներ, այս տուրում միանգամից 3 պարտիա հաղթական ավարտ ունեցավ,-հայտնում է Հայաստանի շախմատի ֆեդերացիայի պաշտոնական կայքը:
Հայկ Մարտիրոսյանը սպիտակ խաղաքարերով առավելության հասավ գործող չեմպիոն Հովհաննես Գաբուզյանի նկատմամբ, Սամվել Տեր-Սահակյանը սպիտակ խաղաքարերով ուժեղ գտնվեց Տիգրան Լ. Պետրոսյանից, իսկ սև խաղաքարերով հանդես եկող Զավեն Անդրիասյանը հաղթեց Մանուէլ Պետրոսյանին: Շանթ Սարգսյանի հետ պարտիայում հաղթանակի հասնելու լավ հնարավորություն ուներ նաև Կարեն Գրիգորյանը, սակայն որոշիչ պահին Գրիգորյանը չկարողացավ գտնել հաղթանակի տանող միակ ուղին, և պարտիան ավարտվեց հաշտությամբ:
Ոչ-ոքի արդյունք գրանցվեց նաև Ռոբերտ Հովհաննիսյան – Տիգրան Հարությունյան պարտիայում:
Հինգերորդ տուրից հետո աղյուսակը 4 միավորով շարունակում է գլխավորել Ռոբերտ Հովհաննիսյանը։ Երկրորդ հորիզոնականում ընթացող Արման Փաշիկյանը վաստակել է 3 միավոր, սակայն Փաշիկյանը Հովհաննիսյանից մեկ պարտիա քիչ է խաղացել: Տիգրան Հարությունյանը, Շանթ Սարգսյանը և Հայկ Մարտիրոսյանը 2.5-ական միավորով կիսում են 3-5-րդ հորիզոնականները:
Այսօր տեղի կունենա մրցաշարի 6-րդ տուրը:
6-րդ տուրի զույգեր.
Գրիգորյան Կարեն – Հովհաննիսյան Ռոբերտ
Հարությունյան Տիգրան – Պետրոսյան Մանուէլ
Անդրիասյան Զավեն – Մարտիրոսյան Հայկ
Գաբուզյան Հովհաննես – Տեր-Սահակյան Սամվել
Փաշիկյան Արման – Սարգսյան Շանթ
Հետևեք մեզ նաև Telegram-ում