«Բարսելոնան» ակումբի պատմության ռեկորդ է կրկնել

Իսպանիայի առաջնության 21-րդ տուրի «Ալավեսի» դեմ տնային խաղը (2:1) ռեկորդային է դարձել «Բարսելոնայի» համար: Կատալոնական թիմը Լա լիգայի մեկնարկից սկսած առանց պարտությունների շարքը հասցրել է 21 խաղի, որն ակումբի պատմության ռեկորդի կրկնությունն է,- գրում է «Opta»-ն:

Նախկինում նման մեկնարկ «բլաուգրանան» գրանցել էր միայն 2009-10թթ. առաջնությունում, երբ թիմը գլխավորում էր Խոսեպ Գվարդիոլան: Այն ժամանակ «Բարսելոնան» մեկնարկային 21 խաղում 17 հաղթանակ է տոնել ու 4 ոչ-ոքի գրանցել: Ընթացիկ խաղարկությունում Էրնեստո Վալվերդեի թիմն ավելի հաջող արդյունքի է հասել` 18 հաղթանակ և 3 ոչ-ոքի:

Նշենք, որ հաջորդ տուրում «կապտանռնագույնները» հյուրընկալվելու են «Էսպանյոլին», որից կրել են ընթացիկ մրցաշրջանի միակ պարտությունը (0:1, Իսպանիայի գավաթ):