USD
EUR
RUB

Մրցաշրջանի լավագույն մարզչական նշանակումները

 

Ընթացիկ մրցաշրջանի կեսից ավելին արդեն անցել է և կարելի է եզրակացություններ անել մարզիչների աշխատանքի մասին: Sport.Times.am ներկայացնում է իր վարկածով ընթացիկ մրցաշրջանից առաջ և ընթացքում թոփ-5 լիգաներում մարզչական լավագույն նշանակումները:

10. Էուսեբիո Դի Ֆրանչեսկո («Ռոմա»)

Իտալացին բարդ իրավիճակում էր: Նա փոխարինեց Լուչիանո Սպալետիին, ում գլխավորությամբ Իտալիայի նախորդ առաջնությունում «գայլերն» իրենց համար ռեկորդային` 87 միավոր էին վաստակել: Նույնիսկ չեմպիոնական տարիներին հռոմեացիները նման արդյունք չեն գրանցել: Դի Ֆրանչեսկոյի օրոք «Ռոման» նույնչափ համոզիչ չէ, սակայն արդյունքները դեռ գոհացուցիչ են, հատկապես Մոհամեդ Սալահի հեռանալու պարագայում: 22 տուրից հետո «Ռոման» 39 միավորով 5-րդ տեղում էր, իսկ Չեմպիոնների լիգայում մտել է փլեյ-օֆֆ: Մարզական տնօրեն Մոնչիին հրավիրելուց հետո թիմում վերակառուցում է սկսվել, ինչը նշանակում է, որ չեմպիոնական հույսերը կրկին հետաձգվել են:

9. Դոմենիկո Տեդեսկո («Շալկե»)

Գերզենկիրխենցիները նույնպես վարակվեցին «Նագելսմանի սինդրոմով» և գլխավոր մարզչի պաշտոնը վստահեցին երիտասարդ մասնագետի: Տեդեսկոն ընդամենը 32 տարեկան է: Նա հագնվում է Սթիվ Ջոբսի նման և փորձում է նորարար լինել: «Շալկեում» երեք ֆուտբոլիստներ կան, որոնք գլխավոր մարզչից տարիքով մեծ են:

Այնուամենայնիվ իտալա-գերմանացին կարողացել է օգտվել Բունդեսլիգայում առկա ներկայիս խաղային ճգնաժամից: Նույնիսկ «Բավարիան» տևական ժամանակ չէր տպավորում, սակայն Յուպ Հայնկեսի նշանակումից հետո հաղթանակների փոքր շարքից հետո արդեն 16 միավորի առավելություն ունի հետապնդող խմբի նկատմամբ: Այդ խումբը գլխավորում են «Շալկեն» ու «Բայերը»: Վերջինիս մարզիչը նույնպես նորեկ է` Հայկո Հերլիխը, սակայն նա իր տրամադրության տակ ունի շատ ավելի որակյալ ֆուտբոլիստներ: 32-ամյա մարզիչը եկավ մի թիմ, որը Եվգենի Կոնոպլյանկայի ու նախկին մարզչի միջև սկանդալի կիզակետում էր, իսկ թիմի լավագույն խաղացող Լեոն Գորետցկան մտքերով այլ թիմում է: 

Նույնիսկ այդ խնդիրների առկայության պարագայում Տեդեսկոն 4 տարվա ընդմիջումից հետո «Շալկեին» վերադարձրել է լավագույն եռյակ և եթե պահպանի այդ դիրքը, հերոս կհամարվի: 

8. Ֆրանկ դե Բուր («Քրիսթալ Փելաս»)

Մի զարմացեք հոլանդացուն այս ցանկում տեսնելով: Դե Բուրի թիմը մեկնարկային 4 խաղում 4 պարտություն կրեց, ոչ մի գոլ չխփեց, իսկ Ֆրանկը պաշտոնանկ արվեց: Սակայն նրա նշանակումը շատ ճիշտ որոշում էր, պարզապես պետք էր համբերատար լինել: Լոնդոնցիները բոլոր հանդիպումներում պարտվել են գոլային պահերի սարսափելի իրացման պատճառով: Understat.com-ում կարող ենք համոզվել, որ այդ խաղերում նրանց «սպասված գոլերի» (xG) ցուցանիշը 4,07 էր: Այսինքն՝ բոլոր պահերի համագումարում նրանք 4 հարյուրտոկոսանոց պահ են ունեցել: Իսկ հաշվի առնելով, որ հաճախ xG-ն ավելի լավ է օգտագործվում, կարելի է վստահորեն ասել` «Քրիսթալ Փելասից» արժեր նույնիսկ 6-8 գոլ ակնկալել: Նման քանակի պահերի առկայության պարագայում գոլ չխփելու հնարավորությունը 5 տոկոս է եղել: Այո, ստեղծված պահերի քանակով Դե Բուրի թիմն արժանիորեն պարտվեց «Հադերսֆիլդին» (0:3) ու «Լիվերպուլին» (0:1), սակայն կարող էր ոչ-ոքի խաղալ «Սուոնսի» հետ (0:2) ու պարտավոր էր հաղթել «Բերնլիին» (0:1): Դե Բուրի պաշտոնանկությունն «արծիվների» ղեկավարների խուճապի հետ կարելի է կապել: Ակնհայտ էր, որ անհաջողությունները շուտով ավարտվելու էին, և ավարտվեցին, բայց դա արդեն Ռոյ Հոջսոնի օգտին էր:

7. Կիկե Սետեն («Բետիս») 

Իսպանացին կարողացել էր «Լաս Պալմասի» հետ ոչ միայն Լա լիգայի, այլ ամբողջ Եվրոպայի ամենագեղեցիկ ֆուտբոլներից մեկը ցուցադրել: 2017 թվականի ամռանը «Բետիսը» գլխավորելուց հետո Սետենն իր այդ համբավի շնորհիվ կարողացավ մի քանի որակյալ նորեկների հրավիրել: Պրիմերայի արդեն առաջին տուրերից հետո պարզ դարձավ, որ Սետենի շնորհիվ կա ևս մեկ թիմ, որի հարձակվողական խաղը դիտելու համար արժե ոչ միայն գրանդների հանդիպումները ցուցադրել: Առայժմ «Բետիսի» արդյունքներն անկայուն են: Այս պահին անդալուսցիները 13-րդ տեղում են, սակայն եվրագավաթային 6-րդ հորիզոնականից հետ են ընդամենը 6 միավորով:

6. Խավյեր Կալյեխա («Վիլյառեալ»)

Սեգունդայից վերադառնալուց հետո «Վիլյառեալը» 5 տարի անընդմեջ Լա լիգայում կայուն զբաղեցնում էր 4-6 տեղերը: Այդ ընթացքում «դեղին սուզանավն» անընդհատ վաճառում էր առաջատար խաղացողներին, սակայն Մարսելինո Գարսիա Տորալի շնորհիվ շարունակում էր մարտունակ մնալ: Այն բանից հետո, երբ վերջինս 2016 թվականի օգոստոսին ակումբի ղեկավարների հետ կոնֆիկտի պատճառով լքեց թիմը, Ֆրան Էսկրիբան մեկ տարի կարողացավ շարունակել նրա գործը, սակայն նոր բան չտվեց թիմին: Ընթացիկ մրցաշրջանի մեկնարկը «Վիլյառեալը» տապալեց. 6 տուրերից հետո թիմը զբաղեցնում էր 14-րդ տեղը: Էսկրիբան անհապաղ պաշտոնանկ արվեց և նրան փոխարինեց «Վիլյառեալ Բ»-ի մարզիչ Խավյեր Կալյեխան:

39-ամյա մասնագետին բաժին է հասել վերջին տարիների ամենաթույլ «Վիլյառեալը», որը նաև վաճառեց գլխավոր ռմբարկու Սեդրիկ Բակամբուին: Իրադարձությունների նման ընթացքի պարագայում իսպանացին նախընտրում է պրակտիկ ֆուտբոլը` հարձակվողական խաղի եզակի պոռթկումներով: Սպասված միավորների հաշվարկում (xPoints) նրա թիմը պետք է 9-րդ տեղում լիներ, բայց կարողացել է կարևոր պահերին չսայթաքել և համառության շնորհիվ միավորներ կորզել: Այժմ նրանք 5-րդ տեղում են և նույնիսկ կարող են երազել Չեմպիոնների լիգայի մասին: Կարևոր հատկություն է նաև երիտասարդների հետ հաջող աշխատանքը: Նրա օրոք այդ խաղացողներն իսկապես աճում են:

5. Կլաուդիո Ռանյերի («Նանտ»)

Ֆուտբոլի պատմության գլխավոր անակնկալներից մեկի արարիչը նախորդ մրցաշրջանի ընթացքում անսպասելիորեն պաշտոնանկ արվեց «Լեսթերից», իսկ ամռանը գլխավորեց ֆրանսիական «Նանտը»: 2016-17թթ. մրցաշրջանում պորտուգալացի անվանի նախկին ֆուտբոլիստ Սերժիու Կոնսեյսաուն «դեղձանիկների» հետ փայլուն աշխատանք էր կատարել և երեք տարի անընդմեջ 13-14 տեղերը զբաղեցնող թիմին բարձրացրել մինչև 7-րդ հորիզոնական: Այդ «սխրանքը» չվրիպեց պորտուգալացիների աչքերից և նրան «Պորտուի» մարզչի պաշտոնը վստահեցին:

Նրան փոխարինման եկած Կլաուդիո Ռանյերին շարունակեց այն ֆուտբոլը դավանել, որի շնորհիվ Անգլիայի չեմպիոն էր դարձել: «Նանտը» նույնիսկ իրենից ցածր դիրքերը զբաղեցնող թիմերի հետ գործում է երկրորդ համարով: Այժմ իտալացու թիմը գնդակին միջինը տիրում 44,8 տոկոս ժամանակում, ինչը Լիգա 1-ում նախավերջին արդյունքն է: Անցած տարի այդ հաշվարկում թիմի ցուցանիշները միջին էին (12-րդ տեղ): Առայժմ այդ տակտիկան արդյունք է բերում՝ չնայած թիմը դեռ հակագրոհից գոլ չի խփել:

Ներկայումս «Նանտը» 37 միավորով 5-րդ տեղում է և մեծ քառյակին (ՊՍԺ, «Լիոն», «Մարսել», «Մոնակո») զիջում է 9 միավորով, սակայն եթե «Նիցայի» հետ պայքարում պահպանի ներկայիս դիրքը, եվրագավաթների ուղեգիր կնվաճի:

4. Միշել Տեր-Զաքարյան («Մոնպելյե»)

«Մոնպելյեն» ու «Մոնակոն» այն յուրահատուկ երկու թիմերն են, որոնք քաթարյան շեյխերի «Պարի Սեն Ժերմենի» օրոք կարողացել են չեմպիոն դառնալ: «Մոնպելյեի» դեպքում դա եղել է 2011-12թթ. առաջնությունում: Դրանից հետո թիմը նույնիսկ թոփ-6 չի վերադարձել, իսկ վերջին երկու առաջնություններում տասնյակում չի հայտնվել: Նախորդ ամռանը թիմի ղեկը վստահվեց Հայաստանի հավաքականի նախկին պաշտպան Միշել Տեր-Զաքարյանին: Վերջինս այդ ակումբին է նվիրել ֆուտբոլային կարիերայի 10 տարիները, ինչպես նաև 8 տարի անցկացրել է տարբեր տարիքային թիմերի մարզչի կարգավիճակում: Հայ մասնագետը հարազատ ակումբ վերադառնալուց հետո անմիջապես փոխեց թիմի խաղը: Նա շեշտը դրեց ամուր պաշտպանության վրա, որը Լիգա 1-ի թոփ-ակումբների դեմ տարբեր մրցաշարերի հանդիպումներում դրական ցուցանիշների բերեց.

«Լիոնի» դեմ` 4:1, 0:0

«Մարսելի» դեմ` 1:1

«Նիցայի» դեմ` 2:0

«Մոնակոյի դեմ` 0:0, 1:1, 0:2

ՊՍԺ-ի դեմ` 0:0, 0:4

Պարտությունները գրանցվել են միայն վերջին 5 օրերի ընթացքում, մինչև այդ «Մոնպելյեն» գրանդների դեմ անպարտելի էր:

Խնդիրներն ավելի շատ են համեմատաբար թույլ թիմերի դեմ հանդիպումներում, որոնց հետ հարկադրված պետք է ավելի բաց գործել: 54-ամյա մասնագետի թիմում հիմնական շեշտը դրվում է եզրային խաղի վրա: «Մոնպելյեն» կենտրոնով գրոհում է միայն 19 տոկոս դեպքերում (Լիգա 1-ում ամենացածր ցուցանիշը), ձախ եզրով` 40%, աջով` 41: Առայժմ դա արդյունք է տալիս: «Մոնպելյեն» 31 միավորով 7-րդ տեղում է և կարող է վերջին տարիների լավագույն ցուցանիշը գրանցել: Նրանք նույնիսկ կարող էին տիտղոս նվաճել: Թիմը հասել էր Ֆրանսիայի Լիգայի գավաթի կիսաեզրափակիչ, սակայն երեկ պարտվեց «Մոնակոյին»:

3. Լուչիանո Սպալետի («Ինտեր»)

Դեռ հիշողությունների մեջ թարմ է, թե ինչպես «Ինտերը» դարձավ Չեմպիոնների լիգայի հաղթող (2010 թվական): Այժմ ժամանակները փոխվել են: «Ինտերը» 7 տարի է՝ Ա Սերիայի լավագույն եռյակում չի հայտնվել ու Չեմպիոնների լիգայում չի խաղացել: «Ռոմայում» արտակարգ մրցաշրջան անցկացրած Լուչիանո Սպալետին «Ինտեր» հրավիրվեց, որովհետև «ներաձուրին» մերժում էր ստացել Դիեգո Սիմեոնեից ու Անտոնիո Կոնտեից: Նրա առջև Եվրոպայի գլխավոր ակումբային մրցաշար վերադառնալու խնդիր է դրվել, որը նա այս պահին կատարում է: 

Ակումբի պատմության լավագույն մեկնարկից հետո խոսակցություններ սկսվեցին «Ինտերի» չեմպիոնության մասին, ինչի պատճառով ներկայիս անհաջող շարքը որպես տապալում է թվում: Չեմպիոնական հույսերը կապված էին նաև թեթև խաղացանկի հետ, որովհետև «Ինտերը» եվրագավաթներին չի մասնակցում: Սակայն հետո Սպալետին ինքն ասաց, որ «Նապոլիի» ու «Յուվենտուսի» հետ մրցակցելն այս տարի անհնար է, ուստի նրանց նպատակը շարունակում է մնալ Չեմպիոնների լիգայի ուղեգիրը:

Սպալետին կարողացավ երկար տարիներ «անդունդում» գտնվող թիմին մոտեցնել լավագույնների մակարդակին, ինչը նրան հաջողվեց թիմում լավ մթնոլորտ ստեղծելու, հիմնական կազմի ֆուտբոլիստներին առանձնացնելու (անփոխարինելի դարձնելու) և «Միլանի» տրանսֆերային աղմուկի ֆոնին աննկատ մնալու շնորհիվ: «Ինտերի» խաղում գլխավոր խնդիրը վինգերներից ու նրանց եզրային փոխանցումներից մեծ կախվածություն ունենալու մեջ: Միջինը մեկ խաղում նրանք 28 եզրային փոխանցում են կատարում (ամենաշատն Ա Սերիայում): Եթե դա չի աշխատում, լուրջ խնդիրներ են սկսվում: Ռաֆինյա Ալկանտարայի տեղափոխությունը հենց հարձակումն ավելի բազմակողմանի դարձնելուն է ուղղված: «Ներաձուրիի» չինացի ղեկավարներն իրենց համաքաղաքացիների համեմատ գումարային ռեսուրսներն ավելի մտածված են ծախսում: Եթե թիմը հայտնվի ՉԼ-ում, Սպալետին ամռանը լուրջ համալրում կստանա:

2. Մարսելինո Գարսիա Տորալ («Վալենսիա»)

Երկու տարի տևած «սև շրջանից» հետո Իսպանիայում կրկին բոլորը «Վալենսիայի» հետ հաշվի են նստում: «Չղջիկները» երկու տարի անընդմեջ 12-րդ տեղը զբաղեցրեցին, ինչը լուրջ հարված էր նրանց հեղինակությանը: Սինգապուրցի մեծահարուստ Պիտեր Լիմը 2014 թվականից դարձել էր «Վալենսիայի» գլխավոր բաժնետերը, բայց միայն 2017 թվականի ամռանը մարզչի հարցում ճիշտ որոշում կայացրեց: Նա հրավիրեց Մարսելինոյին, ով մեկ տարի առանց աշխատանքի էր մնացել: Վերջինս փոխեց ամեն ինչ: Իսպանացին ֆուտբոլիստների համար ֆիզիկական պատրաստվածության նոր չափանիշներ սահմանեց և նույնիսկ պահանջեց փոխել նրանց ընտանեկան սնունդը, ինչը խիստ զայրացրեց թիմի ավագ Դանի Պարեխոյի կնոջը: Փոխարենը, Պարեխոն 5կգ քաշ գցեց և վերադարձավ այն խաղամակարդակին, որը վաղուց չէր ցուցադրել:

«Վալենսիային» օգնեցին նաև տրանսֆերները: Թիմն ամրապնդեցին Սիմոնե Ձաձան ու Գոնսալու Գեդեշը: Վերջինս ՊՍԺ-ի նոր աստղերի օրոք խաղալու շանս գրեթե չէր ստանալու: Մարսելինոն հստակ առանձնացրեց մեկնարկային կազմի 11 ֆուտբոլիստներին, որոնց հիմնականում փոխարինում են 4-5 խաղացողներ: Եվրագավաթների բացակայությունը նման քայլի դիմելու հնարավորություն էր տալիս:



Արդյունքում, «Վալենսիան» Լա լիգայում ակումբի պատմության լավագույն մեկնարկը գրանցեց և երկար ժամանակ երկրորդ տեղում էր ընթանում: Այժմ թիմը երրորդն է և հիանալի շանսեր ունի գլխավոր նպատակին հասնելու համար` նվաճելու Չեմպիոնների լիգայի ուղեգիր: Դա լրացուցիչ գումար կտա, և նրանք կկարողանան գնել Գեդեշի ամբողջական տրանսֆերը: Իսպանիայի գավաթում «չղջիկները» հասել են կիսաեզրափակիչ, որում «Բարսելոնայի» արգելքը հաղթահարելու դեպքում կարող են վերջին 10 տարվա ընթացքում առաջին տիտղոսը նվաճել:

1. Էրնեստո Վալվերդե («Բարսելոնա»)

Իսպանացի մասնագետը երկու անգամ լրջորեն դիտարկվել էր «Բարսելոնայի» գլխավոր մարզչի պաշտոնում (պայքարը զիջել է Տատա Մարտինոյին ու Լուիս Էնրիկեին), սակայն միայն երրորդ փորձից ստացավ երկար սպասված պաշտոնը: Առաջին նորություններից մեկը, որ նա ստացավ. Նեյմարը կարող է հեռանալ «Բարսելոնայից»: Ամբողջ ամառային նախապատրաստական փուլը 53-ամյա մասնագետը նվիրեց բրազիլացուն առաջատարի դեր տալու վրա, որպեսզի նրան համոզի մնալ Կատալոնիայում, սակայն ընկերական խաղերում փայլելը չազդեցին Նեյմարի որոշման վրա: Նա հեռացավ և ամբողջ հուլիս ամսին Էրնեստոյի կատարած տակտիկական աշխատանքները փլուզվեցին: Իսկ առջևում «Ռեալի» դեմ սուպերգավաթային խաղերն էին, որոնցում «կապտանռնագույնները» չհասցրեցին վերադասավորվել և իրենց ստվերին էին նման: Անմիջապես կատաղի քննադատություն հետևեց Վալվերդեի կողմը, սակայն ակնհայտ էր, որ նա հանգամանքների զոհ է դարձել:

«Բարսելոնային» միացան Պաուլինյոն և Ուսման Դեմբելեն: Վերջինս պետք է դառնար Նեյմարին փոխարինողը, սակայն ծանր վնասվածք ստացավ և Վալվերդեն անցավ 4-4-2 սխեմային, որում Պաուլինյոն մեկնարկային կազմի ֆուտբոլիստ դարձավ: Սկզբնական շրջանում, երբ համակարգը դեռ լավ չէր աշխատում, «Բարսելոնային» գոլեր էր մատակարարում Մեսսին, իսկ դարպասում հրաշքներ էր գործում Տեր Շտեգենը: Այդ երկուսի, ինչպես նաև Ժորդի Ալբայի ու Սամուել Ումտիտիի հաջող ելույթների շնորհիվ «Բարսան» արդյունքների տեսանկյունից փայլուն մեկնարկեց: Հետագայում Վալվերդեն գտավ երկար սպասված հավասարակշռությունը և թիմն անպարտելի դարձավ: Մինչև հունվար…

Վալվերդեն հիանալի լուծեց նաև Լուիս Սուարեսի խնդիրը: Ուրուգվայցին մրցաշրջանը մեկնարկեց իր կարիերայի վատագույն ֆուտբոլը ցուցադրելով: «Մրջյունը» հասկացավ, որ Լուիսին ժամանակ է հարկավոր մարզավիճակ հավաքելու համար և շարունակեց նրան վստահել, ինչը դեկտեմբերին սկսեց արդյունք տալ: Այժմ Սուարեսը կարճ ժամանակում այնքան գոլ է խփել (16), որ ռմբարկուական պայքարում դարձել է Մեսսիի (20) գլխավոր մրցակիցը:

Վալվերդեի և անցած տարվա Լուիս Էնրիկեի թիմերի գլխավոր տարբերությունն այն է, որ ներկայիս «Բարսելոնան» կարողանում է հաղթանակներ կորզել, երբ թիմը հոգնած է լինում կամ թույլ մրցակցի հարկի տակ մոտիվացիան քիչ է լինում: Նա կարողանում է փոխարինումներին ու տակտիկական ճիշտ որոշումների շնորհիվ միավորներ վաստակել: Այժմ նրա թիմը Լա լիգայում 11 միավորի առավելություն ունի և միայն աղետի դեպքում կկորցնի չեմպիոնի կոչումը: Իսպանիայի գավաթում «բլաուգրանան» արդեն կիսաեզրափակչում է, իսկ Չեմպիոնների լիգայում մրցելու է «Չելսիի» հետ, որի դեմ նույնպես ֆավորիտ է: Կարծես թե «Բարսելոնան» գտել է այն մարզչին, որը չի կրկնի Լուիս Էնրիկեի սխալը, չի ստեղծի «ընտանեկան թիմ», որը «միասնականության շնորհիվ» անհավանական քամբեքներ կկատարի թոփ-մրցակիցների դեմ խաղերում, սակայն մի քանի օր անց կպարտվի հետնապահներին: Այո, այս «Բարսելոնան» Գվարդիոլայի ժամանակների էսթետիկ ֆուտբոլը չի ցուցադրում, բայց եթե ուզում եք ձեր թիմը նման կերպ խաղա, պետք է այն մարզի հենց Գվարդիոլան: Ներկայիս ֆուտբոլում նմանատիպ այլ մարզիչ չկա: Վալվերդեին հրավիրել են այն պատճառով, որ նա տիրապետում է կոնկրետ մարզչական հատկությունների, այլ ոչ թե փոփոխական է:

Վիճակագրական տվյալները` whoscored.com և understat.com կայքերից
Հայկ Հովհաննիսյան

Լրահոս
Բեյլը չի ուզում միանալ «Տոտենհեմ»-ին «Ռեալ»-ը նոր պայմանագիր կառաջարկի Բենզեմային Հրանտ Մելքումյանն առայժմ 4-րդ տեղում է Վահանյանն ԱԱ-ի առաջատարին զիջում է կես միավորով Ռոնալդուն գաղտնի ամուսնացել է ՈՒԵՖԱ-ն Արամ Հայրապետյանին ճանաչել է Հայաստանի ընտրանու լավագույն ֆուտբոլիստ Գաբուզյանը 9-րդն է Սենթ Լուիսում Արոնյանը մեկնարկում է հնդկական Տատա Սթիլ մրցաշարում Բերեզովսկին` «Սոչի»-ի գլխավոր մարզչի ժամանակավոր պաշտոնակատար Մոուրինյոն նշանակվել է «Տոտենհեմ»-ի գլխավոր մարզիչ Եվրո-2020. Հայտնի են մասնակից 20 հավաքականները և նրանց բաշխվածությունը ըստ զամբյուղների Իտալիայի և Հայաստանի Մ-21 հավաքականների խաղը ևս ավարտվել է ոչ ֆուտբոլային հաշվով Հայաստանի Մ21 հավաքականի մեկնարկային կազմը Իտալիայի հետ խաղում Մ21. Իտալիա-Հայաստան հանդիպումը հետաձգվել է Շվեյցարիան և Դանիան դուրս են եկել Եվրո-2020 Վանաձորի թիմը` հանդբոլի Հայաստանի չեմպիոն Հովհաննես Դավթյան․ Առաջնության արդյունքներով կձևավորենք հավաքական թիմ Հայաստանի հավաքականը 9:1 հաշվով զիջեց Իտալիայի ընտրանուն. ՏԵՍԱՆՅՈՒԹ Աբրահամ Խաշմանյան. Եթե ղեկավարությունը կորոշի, որ այս ամենի մեղքն իմն է, ես պատրաստ եմ վաղն ամեն ինչ վերջացնել Անտոնիո Ֆլորեսը ֆուտբոլի երիտասարդական թիմի խաղում որակական աճ է տեսնում Ֆուտբոլի կանանց Մ19 թիմը հավաք կանցկացնի Երևանում Բռնցքամարտիկ Կարեն Տոնականյանը Բելառուսի միջազգային մրցաշարում նվաճել է արծաթե մեդալ Հայաստանի ձյուդոյի առաջնության չեմպիոնները հայտնի են Տիգրան Բարսեղյանը կարող է տեղափոխվել հունական ակումբ Բրազիլացի 17-ամյա տաղանդը կարող է տեղափոխվել «Բարսելոնա» Հայաստանի ազգային հավաքականը մեկնեց Իտալիա Մեսսին վիճել է Բրազիլիայի հավաքականի մարզչի հետ Հայաստան-Հունաստան խաղից հետո կան բերման ենթարկվածներ Վահանյանը և Մովսիսյանը վետերանների ԱԱ-ի առաջատարներից են Մանչինին բացառիկ արդյունք է գրանցել Իտալիայի հավաքականի հետ Լյովը Գերմանիայի հավաքականը ֆավորիտ չի համարում Շախմատի համաշխարհային Օլիմպիադան կկայանա 2020 թվականի օգոստոսին Ռամոսը և Պիկեն կարող են մասնակցել Տոկիոյի Օլիմպիական խաղերին Եվրո-2020-ի ուղեգիր են նվաճել արդեն 10 հավաքական Վահանյանը և Մինասյանը հաղթանակ են տարել ԱԱ-ի երկրորդ տուրում Իբրահիմովիչը հրաժեշտ է տվել թիմակիցներին. Զլատանը վերադառնում է Արսեն Վենգերն այսուհետ կաշխատի ՖԻՖԱ-ում Դելֆը վնասվածքի պատճառով լքել է Անգլիայի հավաքականը Մխիթարյանի վերադարձով «Ռոմա»-ն նորից կսկսի թռչել. Ֆոնսեկա Մեսսին դեռ պատրաստ չէ երկարաձգել պայմանագիրը «Բարսելոնայի» հետ
website by Sargssyan