Զիդան․ Հաճելի էր, որ Մարսելոն գոլն ինձ նվիրեց
Նմանատիպ
Մադրիդի «Ռեալի» գլխավոր մարզիչ Զինեդին Զիդանն Իսպանիայի առաջնության 24-րդ տուրի՝ «Բետիսի» հետ հանդիպումից առաջ պատասխանել է լրագրողների հարցերին։ Ֆրանսիացի մասնագետի մամուլի ասուլիսը ներկայացրել է «Marca»-ն։
«Պարի Սեն Ժերմենի» հետ խաղերով պայմանավորված թիմի շուրջ ստեղծված լարվածության մասին
«Մենք սովորել ենք։ Թիմը լավ արդյունքի հասավ առաջին խաղում, իսկ այժմ առաջնության մասին մտածելու ժամանակն է։ Չեմպիոնների լիգայում կարևոր հաղթանակ տոնեցինք, բայց լինելու է պատասխան հանդիպում, իսկ մինչ այդ 5 խաղ ունենք առաջնությունում»։
Մրցաշրջանի արդյունքներով իր ապագայի մասին
«Ինձ համար ամենակարևորը ներկա պահն է։ Այդպես ամեն օր։ Ցանկանում եմ՝ լավ ավարտենք այս մրցաշրջանը, քանի որ պայքարելու տեղ ունենք։ Ապագայիս վերաբերյալ հարցերն այժմ չեն հետաքրքրում ինձ»։
Բենզեմայի նկատմամբ վստահության մասին
«Վստահում եմ բոլոր ֆուտբոլիստներին։ Մենք ինտենսիվ մարզումներ և ժամանակացույց ունենք, այնպես որ՝ բոլոր ֆուտբոլիստներն անհրաժեշտ են ինձ»։
ՊՍԺ-ի հետ խաղում Մարսելոյի՝ գոլը տոնելու մասին
«Շատ հաճելի էր, որ Մարսելոն վազեց ինձ մոտ և գոլը նվիրեց ինձ։ Ես հիանալի հասկանում եմ, թե հանդերձարանում ինչեր կարող են լինել, քանի որ 18 տարի ֆուտբոլիստ եմ եղել։ Ինձ դուր է գալիս, թե այժմ ինչպիսի կապ կա ֆուտբոլիստների միջև։ Այդ հարաբերությունները շատ կարևոր են։ Շնորհակալ եմ ֆուտբոլիստներիս ինձ աջակցելու համար։ Հաճելի է տեսնել, որ նրանք հասկանում են ինձ»։
Ռոնալդուի մարզավիճակի մասին
«Երբեք չի կարելի կասկածի տակ դնել Ռոնալդուի ուժը՝ եթե անգամ նա քիչ է գոլեր խփում կամ քիչ պահեր է ունենում։ Ցանկացած պահի իրավիճակը կարող է փոխվել, և բոլորը գիտեն այդ մասին։ Չեմ կարող ասել, թե նա լավագույն մարզավիճակում է, սակայն հեռու չէ դրանից»։
«Ռեալի» գլխավոր մարզիչը լինելու դժվարությունների մասին
«Աշխատանքը շատ ուժ է խլում։ Հասկանալի է, որ գալու է փոփոխությունների ժամանակը։ Փոփոխություն ոչ միայն գլխավոր մարզչի հարցում։ Ընդհանրապես մարզչական աշխատանքը լարված է, իսկ Մադրիդում ավելի շատ»։
«Բետիսի» հետ խաղի մասին
«Մենք համապատասխան ծրագիր և նպատակ ունենք։ Ցանկանում ենք լավ հանդիպում անցկացնել»։
Առաջնությունում առաջիկա 5 խաղի մասին
«Զրուցել եմ բոլոր ֆուտբոլիստների հետ։ Թիմն այս ընթացքում բոլորի կարիքն ունենալու է։ Առաջիկա խաղերը չափազանց կարևոր են, և մենք պետք է պատրաստ լինենք»։
Ասենսիոյի մասին
«Այսօր ինձ հարցնում եք Ասենսիոյից, երեկ խոսում էիք Իսկոյից, իսկ մի քանի օր առաջ՝ Սեբալյոսից։ Բոլորս մեկ նավակում ենք, իսկ կազմն ընտրողը ես եմ։ Մենք պայքարում ենք, իսկ ֆուտբոլիստները սպասում են իրենց հնարավորությանը»։
Հետևեք մեզ նաև Telegram-ում