Ռոնալդուն ճանաչվել է Պորտուգալիայի լավագույն ֆուտբոլիստ

Մադրիդի «Ռեալի» հարձակվող Կրիշտիանու Ռոնալդուն դարձել է 2017 թվականի Պորտուգալիայի լավագույն ֆուտբոլիստ:

Marca.com-ը հայտնում է, որ քվեարկության արդյունքում 33-ամյա ֆուտբոլիստն առաջ է անցել «Սպորտինգի» դարպասապահ Ռուի Պատրիսիուից ու «Մանչեսթեր Սիթիի» կիսապաշտպան Բերնարդու Սիլվայից:

Կրիշտիանուն 9-րդ անգամ ստացավ լավագույն ֆուտբոլիստի մրցանակը:

Հիշեցնենք, որ նախորդ տարվա ընթացքում Ռոնալդուն «Ռեալի» հետ 5 տիտղոս է նվաճել, այդ թվում դարձել է Չեմպիոնների լիգայի գավաթակիր ու Իսպանիայի առաջնության հաղթող: Նրա օգնությամբ Պորտուգալիայի հավաքականը նվաճել է Աշխարհի առաջնության եզրափակիչ փուլի ուղեգիր:

Նախորդ օրացույցային տարվա ընթացքում հարձակվողը 53 գոլ է խփել:

Հավելենք, որ լավագույն մարզիչ է ճանաչվել «Մոնակոն» գլխավորող Լեոնարդու Ժարդիմը: