Ըմբշամարտի Մ23 ԵԱ. Վազգեն Թևանյանը եզրափակիչում է

ԵՐԵՎԱՆ, 9 ՄԱՐՏԻ, Tert.am: Վազգեն Թևանյանը (65 կգ) նվաճեց Սերբիայի Նովի Սադ քաղաքում մարտի 8-ին մեկնարկած ազատ ոճի ըմբշամարտի Եվրոպայի մինչև 23 տարեկանների առաջնության եզրափակիչի ուղեգիր: Այս մասին տեղեկացնում է ՀԱՕԿ-ի պաշտոնական կայքը:

Հայաստանի ներկայացուցիչը պայքարը սկսեց 1/8 եզրափակիչից, որտեղ 8:6 հաշվով հաղթեց Ֆրանսիան ներկայացնող Իլման Մուխտարովին: Քառորդ եզրափակիչում հայ ըմբիշը 17:4 հաշվով ուժեղ գտնվեց թուրք Սելիմ Կոզմանից, իսկ կիսաեզրափակիչում պարտության մատնեց մոլդովացի Մաքսիմ Սակուլտանին՝ 2:1: Մարտի 9-ին կայանալիք եզրափակիչում Թևանյանը կգոտեմարտի վրացի Էդեմի Բոլկվաձեի հետ:

Ազատ ոճի ըմբշամարտի Եվրոպայի Մ-23 առաջնության առաջին օրը Հայաստանի երիտասարդական հավաքականն ուներ ևս 2 ներկայացուցիչ: Վաղինակ Մաթևոյանը (57 կգ) մեկնարկեց քառորդ եզրափակիչից և 1:3 հաշվով պարտվեց վրացի Ռոբերտի Դինգաշվիլիին, իսկ Գևորգ Մխեյանը (70 կգ) որակավորման փուլում հաղթանակով մեկնարկելուց հետո քառորդ եզրափակիչում պարտվեց մոլդովացի Վասիլի Դյակոնին՝ 3:10: Մաթևոյանին ու Մխեյանին հաղթած ըմբիշներին չհաջողվեց հասնել եզրափակիչ, ինչից հետո Հայաստանի ներկայացուցիչները զրկվեցին բրոնզե մեդալի համար պայքարելու հնարավորությունից:

Ազատ ոճի ըմբշամարտի Հայաստանի ազգային հավաքականի գլխավոր մարզիչ Հաբեթնակ Կուրղինյանի գլխավորությամբ Նովի Սադում հանդես կգան նաև Հրաչյա Մարգարյանը (61 կգ), Խաչատուր Պապիկյանը (74 կգ), Հովհաննես Մխիթարյանը (86 կգ) և Սարգիս Հովսեփյանը (92 կգ):

Հիշեցնենք, որ հունահռոմեական ըմբշամարտի Հայաստանի երիտասարդական հավաքականը մեկ արծաթե մեդալով էր ավարտել ելույթը Եվրոպայի Մ-23 առաջնությունում: Արմեն Բաբալարյանի գլխավորած թիմի կազմում Եվրոպայի փոխչեմպիոն դարձավ 63 կգ քաշային Սլավիկ Գալստյանը:

Հայ ըմբիշը պայքարը սկսել էր 1/8 եզրափակիչից և բելառուս Ալեքսանդր Պեչուրենկայի (9:0), թուրք Աբդուլահ Տոպրակի (10:1) ու ուկրաինացի Ալեքսանդր Հրյուշինի (13:4) նկատմամբ վստահ հաղթանակներից հետո դուրս էր եկել եզրափակիչ: Ոսկե մեդալը Սլավիկ Գալստյանը վիճարկել էր վրացի Լևանի Կավյարադաձեի հետ և լարված պայքարում պարտվել 8:10 հաշվով: Ըմբշամարտի միջազգային ֆեդերացիայի (UWW) մամուլի ծառայությունն այդ գոտեմարտը որակել է «թրիլերային»: Հայաստանի մյուս ներկայացուցիչներից Նորայր Հախոյանը (55 կգ), Արմեն Մելիքյանը (60 կգ), Հրանտ Կալաչյանը (72 կգ) և Դավիթ Օվասապյանը (130 կգ) հաղթանակով մեկնարկելուց հետո պարտություն էին կրել երկրորդ գոտեմարտերում: Հրանտ Կալաչյանին ու Դավիթ Օվասապյանին հաղթած ըմբիշները նվաճել էին եզրափակիչի ուղեգիր, ինչից հետո Հայաստանի ներկայացուցիչները հնարավորություն էին ստացել պայքարել բրոնզե մեդալի համար, սակայն պարտություն էին կրել սփոփիչ գոտեմարտերում: