«Արագած»-ը ձգտելու է հաջորդ տարի ևս հաղթել բասկետբոլի առաջնությունում
Նմանատիպ
ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: Բասկետբոլի Հայաստանի կանոնավոր առաջնության 2018/19 մրցաշրջանի հաղթող Երևանի «Արագած»-ն ամեն ինչ անելու է տիտղոսը հաջորդ մրցաշրջանում պահպանելու համար:
«Արմենպրես»-ի մամուլի սրահում լրագրողների հետ հանդիպման ժամանակ այս մասին փաստեց ակումբի նախագահ Դավիթ Ջոնթոյանը: «Լիգայի ամբողջ ընթացքում դժվարություններ ունեցանք «Արցախ»-ի հետ խաղում, լավ խաղ ցուցադրեց նաև «Արթիկ»-ը: Իր ունակություններով առանձնացավ նաև «Ուրարտու»-ն: Մենք ի սկզբանե աշխատանքներ էինք տանում, որ չեմպիոն դառնանք, և այդպես էլ եղավ: Հայաստանի այս տարվա առաջնությունն իսկապես ստացված էր: Մյուս տարի նույն ձևով աշխատանքներ ենք տանելու կրկին երկրի չեմպիոն դառնալու համար,- շեշտեց Ջոնթոյանը:
«Արագած»-ի նախագահի խոսքով՝ ակումբին դժվար կլինի մրցակցել եվրոպական մրցասպարեզներում, քանի որ դրա համար հսկայական գումարներ են հարկավոր: Այս տարի թիմը հանդես չի գա Եվրոգավաթում:
Ջոնթոյանի խոսքով` հաշվի առնելով Լիբանանի փորձը բասկետբոլի մասսայականացման համար առաջնության խաղերը պետք է հեռարձակվեն հեռուստատեսությամբ:
Ա լիգայի եզրափակչի չորրորդ՝ «Ուրարտու Վիվարո»- «Արագած» խաղում, «Արագածը» 97-87 հաշվով առավելության հասավ «Ուրարտու Վիվարո»-ի նկատմամբ և հռչակվեց Ա լիգայի չեմպիոն: Լավագույն եռյակը եզրափակեց Ստեփանակերտի «Արցախը»:
Մրցաշարի լավագույն խաղացողներ ճանաչվեցին.
Լավագույն խաղարկող – Ժաքորի Փեյն («Արագած»)
Լավագույն պաշտպան – Դեշան Մետոքս («Ուրարտու Վիվարո»)
Լավագույն թեթև հարձակվող- Ալբերտ Թադևոսյան («Արցախ»)
Լավագույն ծանր հարձակվող – Շեյն Հենրի («Արագած»)
Լավագույն կենտրոնական – Արման Հակոբյան («Արթիկ – Ման Հոլդինգ»)
Լավագույն մարզիչ – Վլադան Գլավինիչ («Արագած»)։
MVP-ն բաժին հասավ Ժաքորի Փեյնին «Արագած» ակումբից:
Մրցանակակիրներին պարգևատրեցին Ա լիգայի նախագահ Արա Պողոսյանը, ՀԲՖ գլխավոր քարտուղար Արթուր Նազարյանը: Ա լիգայի գավաթը հաղթող թիմին փոխանցեց «Արցախ» ակումբի գլխավոր մարզիչ Արեգ Վաթյանը: