Լևոն Ջուլֆալակյանը կշարունակի անձնական մարզչի գործունեությունը
Նմանատիպ
ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: Օլիմպիական խաղերի, աշխարհի և Եվրոպայի չեմպիոն Լևոն Ջուլֆալակյանը կշարունակի անձնական մարզչի գործունեությունը:
«Արմենպրես»-ի հաղորդմամբ` Ջուլֆալակյանն այս մասին ասաց լրագրողների հետ զրույցում:
«Անկախ նրանից, որ հրաժարական եմ տալիս հունա-հռոմեական ըմբշամարտի Հայաստանի հավաքականի գլխավոր մարզչի պաշտոնից` ես շարունակելու եմ իմ անձնական մարզչի գործունեությունը: Ես կլինեմ Արսեն Ջուլֆալակյանի կողքին այնքան ժամանակ, որքան ինքը կցանկանա լինել սպորտում»,- նշեց Ջուլֆալակյանը:
Անդրադառնալով հարցին, թե ում կվստահի հունա-հռոմեական ըմբշամարտի Հայաստանի հավաքականի գլխավոր մարզչի պաշտոնը` Օլիմպիական խաղերի չեմպիոնն ասաց, որ հենց հավաքականը, ՀՀ ԿԳՄՍ նախարարությունը և Հայաստանի ազգային օլիմպիական կոմիտեն պետք է որոշեն, և իրենից ոչինչ կախված չէ, ու ինքը չի ցանկանում որևէ մեկի անուն հնչեցնել:
Անդրադառնալով այլ երկրում մարզչական գործունեություն ծավալելու հարցին` Լևոն Ջուլֆալակյանը շեշտեց, որ բոլոր ժամանակներում էլ իրեն տարբեր երկրներից հրավերներ եղել են:
«Լինելով եմ հավաքականի ու երկրի նվիրյալ՝ ես հաշվի չեմ առել ոչ մի պայման, և աշխատել եմ մեր հավաքականում: Հետագայում չգիտեմ առաջարկներ կլինեն թե չէ, բայց առաջիկայում հոգեպես և ֆիզիկապես որոշել եմ հանգստանալ»,- ասաց Ջուլֆալակյանն ու հավելեց, որ նոր առաջարկի դեպքում դեռևս շուտ է ասել, թե ինչ որոշում կկայացնի:
Հարցին, թե արդյոք ունի՞ առողջական խնդիրներ, նա ասաց, որ բացարձակ բողոքներ չունի, և սիրտն էլ լավ ու հզոր աշխատում է: