Շիրակը հաստատեց. Վարդան Բիչախչյանը կգլխավորի Արարատը

ԵՐԵՎԱՆ, 23 ՀՈՒLԻՍԻ, ArmSport.am: Գյումրիի «Շիրակի» երկարամյա մարզիչ Վարդան Բիչախչյանը կստանձնի Երևանի «Արարատի» գլխավոր մարզչի պաշտոնը:

ArmSport-ի՝ օրեր առաջ հայտնած այս լուրը Գյումրիի թիմն այսօր պաշտոնապես հաստատել է:

Այլ մանրամասներ չեն հաղորդվում: Վարդան Բիչախչյանը հրաժեշտի խոսքով դիմել է երկրպագուներին.

«Սիրելի Շիրակցինե՛ր,

առաջարկ եմ ստացել գլխավորելու Հայաստանի ֆուտբոլի մյուս լեգենդար ակումբն՝ «Արարատ»-ը։ Անկեղծությամբ պետք է խոստովանեմ, որ առաջարկությունն ընդունել եմ մեծ դժվարությամբ, որը բացառապես պայմանավորված էր մեր հարազատ «Շիրակ» ակումբի գլխավոր մարզչի պաշտոնից հեռանալու հանգամանքով։

Ակումբ, որը ոչ միայն եղել է իմ ֆոտբոլային և մարզչական կարերիայի կայացման դարբնոցը, այլև դարձել է մի մեծ ու հարազատ ընտանիք, իր ներկայացուցիչների թասիբի ու աշխարհի լավագույն երկրպագուների շնորհիվ։

Խորին երախտագիտությունս եմ հայտնում «Շիրակ» ՖԱ-ի բոլոր ներկայացուցիչներին և երկրպագուներին՝ անմնացորդ աջակցության ու վստահության համար։ Շնորհակալությունս բոլոր նրանց ում հետ հպարտություն եմ ունեցել վայելելու «Շիրակ»-ի ցանկացած հաջողություն։

Մի քաղաք, մի ակումբ, մի զարկերակ․

Եվ ես միշտ լինելու եմ այդ զարկերակի մի մասինիկը»: