Ժոլտ Հոռնյակ. Ուրախ եմ, որ թիմը ցույց տվեց իր դեմքը
Նմանատիպ
Արդեն տեղեկացրել ենք, որ Հայաստանի Բարձրագույն խմբի առաջնության երրորդ տուրում «Բանանցը» սեփական հարկի տակ 3:0 հաշվով առավելության է հասել «Արարատի» նկատմամբ:
«Բանանցի» գլխավոր մարզիչ Ժոլտ Հոռնյակը հետխաղյա մամուլի ասուլիսի ժամանակ ուրախությամբ նշեց, որ իր թիմն ընթացիկ առաջնությունում վերջապես ցուցադրեց, թե ինչի է ընդունակ:
«Շատ ուրախ եմ թիմի ցուցադրած խաղի համար: Ուրախ եմ, որ թիմը ցույց տվեց իր դեմքը: Առաջին խաղակեսի ընթացքում հանդիպման արդյուքն արդեն պարզ էր: Ուրախ եմ նաև Գևորգ Նռանյանի գոլերի համար. այսօր նա ցույց տվեց, թե ինչու է տեղափոխվել «Բանանց»»,-ասաց Հոռնյակը:
«Բանանցի» մարզիչը գովասանքով արտահայտվեց նաև Ռումյան Հովսեփյանի մասին, ով վերոնշյալ խաղում սկիզբ դրեց իր թիմի հաջողությանը. «Լավ խաղաց նաև Ռումյան Հովսեփյանը, ով «Ուլիսի» հետ հանդիպմանը չէր մասնակցում որոշակի պատճառներով: Այժմ երևում են Ռումյանի` ավելի կատարելագործված որակները և թիմի մյուս խաղացողներից ունեցած տարբերությունը»:
Ժոլտ Հոռնյակն ընդգծեց, որ այսօրվա հաղթանակը միայն Ռումյանի և Գևորգի շնորհքը չէ և նշեց, որ Արամ Լոռեցյանը վատ հանդիպում անցկացրեց. «Այսօրվա հաղթանակը ոչ միայն այս երկու խաղացողների խաղի արդյունքն էր, այլ ամբողջ թիմի: Արամ Լոռեցյանն այս անգամ վատ խաղաց, Երիտասարդական հավաքականի ֆուտբոլիստն այդպես խաղալու իրավունք չունի: Նա փոխարինեց Նաիրի Մինասյանին, քանի որ վերջինս վնասվածք ստացավ: Լոռեցյանի խաղադաշտ դուրս գալուց հետո մեր խաղն ինչ-որ չափով թուլացավ:
Շատ շնորհակալ եմ ֆուտբոլիստներին, որ կարողացան այս շոգ եղանակին խաղալ և կամք ցույց տալ: Ինչ վերաբերում է «Ուլիսի» հետ խաղի համեմատ փոփոխություններին, ապա, այո՛, ես ցանկանում էի հնարավորություն տալ Արամ Հարությունյանին, քանի որ նա շատ լավ դարպասապահ է, չնայած այնպես չէ, որ Թորոյանը վատն է»:
Ժոլտ Հոռնյակը հավելեց, որ, հնարավոր է, թիմում նորեկներ լինեն. «Դեռ սպաում ենք երկու խաղացողի` ենթահրաձակվողի և հարձակվողի` արգենտինացի և սլովակ»:
Հասմիկ Գրիգորյան
Հետևեք մեզ նաև Telegram-ում